Hiar ka bai Sumo sha Nongstoin

Nongstoin, 30 Nailur:
Ka Executive Committee jong ka Nongstoin Tourist Maxi Cab Owners & Driver Association kaba la shong ha ka 26 tarik mynta u bnai kala rai ban pynhiar dor noh  ia ka bai shong sumo na ka T. 140 sha ka T.120 tyngka marwei kata na Shillong sha Nongstoin bad kumjuh Nongstoin Sha Shillong.
Katba na Nongstoin sha Mairang bad Mairang sha Nongstoin kan long noh ha ka dor T.60 tyngka marwei, bad na Nongstoin sha Riangdo lane Riangdo sha Nongstoin ka dor shong sumo kan long noh ha ka dor T.60 tyngka marwei.
Katkum ka kyrwoh na u General Secretary ka NTMCODA Nongstoin la iathuh ba ia katei ka jingpynhiar dor bai shong sumo ha kitei ki jaka ba la thoh kan sdang ban trei kam noh naduh ka 1 tarik u Risaw 2015 kata lashai ka sngi.
Kumta na ka liang jong ka Association kala kyrpad ia ki paidbah nongshong sumo ba lada don kino kino ki nongniah sumo kiba shimtam palat ia katei ka dor bala pynkylla da ka Association kin sngewbha ban pyntip sha ka Association khnang ba ki lah ban leh ia kaba donkam.