Nongstoiñ: U Bah HS Shylla, CEM ka KHADC, ula hiar jurip myn hynnin ka sngi, ia ki ar tylli ki kompeni kiba don hapoh ka West Khasi Hills District bad katei ka jingwan hiar jurip jong u CEM ia kitei ki ar tylli ki kompeni, ka dei hadien ba u la ioh ia ka jingujor na ka Seng Hynniewtrep Youth’s Council (HYC) WKHD.
Na ka liang jong u CEM u la sdang nyngkong eh ban leit jurip ia ka karkhana sain nar kaba don ha ka shnong Riwiang, kaba la tip ruh kum ka Shri Shakhambari Ferro alloys Pvt Ltd, ha ryngkat ka jingiadonlang u BDO ka Nongstoiñ bad Mawthadraishan Block, ki ophisar na ka tnad Labour na Nongstoiñ lem bad ki pulit bad hadien ba la dep ban iakren bad ki heh katei ka karkhana u CEM u la leit ban jurip sa ia ka kompeni shna surok ka BSC C&C JV.
Haba iakren bad ki nongthoh khubor, hadien katei ka jingjurip u bah Shylla, u la ong ha ka jingshisha baroh ki bar jylla kiba wan ban trei bylla hapoh ka jylla Meghalaya ki dei ban ioh ia ka laisen bylla napoh ka KHADC ha ryngkat ka jingpynshisha na ki pulit (Police Verification) bad khamtam ba ki dei ruh ban don ia ka sertiphiket na ka tnad jong ka koit ka khiah khnang ban lait na ka jingsaphriang jong ka jingpang HIV & AIDS.
Ha kaba iadei bad ka karkhana ha Riwiang, u bah Shylla u la ong ba um lah ban len ba katei ka karkhana ka la ai jingmyntoi ia ki paidbah Khasi namar ba ki la ioh lad ban saplai ia u mawlein, u shyiap bad dewiong bad don ruh kiba la ioh ban trei kam ha katei ka karkhana; hynrei haba phai pat sha ka koit ka khiah la sngewthuh ba ka don ka jingktah, namar ki longkmie ki la wanmih ban pynsngew ruh sha u ba ki la don kiba ioh jingpang khlieh, pang khmat bad ha kaba iadei bad kane u bah Shylla u la ong ba un sa thoh sha u Director jong ka tnad ba dei peit ia ka koit ka khiah.
Shuh shuh u la ong ruh ba hadien ka jingjurip u la lap ia shibun kiei kiei bad ha ka jingjurip u la lap ruh ba ki don shibun ki bar jylla ba trei khlem ka labour license, hynrei ki la sdang ban pynbiang noh mynta, katba ha kaba iadei bad ka jingbym bit bym biang jong katei ka karkhana u bah Shylla u la ong ba um lah ban batai, namar um dei u stad karkhana (expert) bad ban batai ia kata hap ban wan peit bad jngoh da ki stad karkhana (expert).
Katba ha kaba iadei bad ka kompani shna surok BSC C&C JV kaba don ha Kynshi u bah Shylla u la ong ba ki bar jylla kiba trei ki la don naduh u snem 2011, hynrei um don wat tang u wei ruh u ban shim ia ka laisen bylla na ka KHADC bad u la ong ruh ba mynta pat ki nongtrei ki don satang kumba 60 ngut ei ei kata ruh ki ban sah sa tang 3 bnai bad kin sa leit phai noh ha u Nohprah mynta u snem bad na ka liang jong ka Council ha kaba iadei bad kane kan hap ban wad jingtip bniah na ka tnad Labour.
U bah Shylla u la kubur ruh ba ka don ka jingdkoh treikam jong ka tnad Labour, namar ba ha kapor ba la pan jingkhein la lap ba ki don tang 4 hajar ngut baroh ki bar jylla kiba shim laisen, hynrei kat kane ka jingtrei hangtei ka shu lait ei bad kane kadei hi ka jingleh sting jong ka tnad Labour napoh ka District Council bad u la ong ruh ba ha kaba iadei bad ka jingbym apllai laisen ka ophis ka hap ban ai jingkhein.
Na ka liang jong ka HYC ka la dawa ruh na u CEM ka KHADC ban nym ai laisen shuh namar kila kynnoh ruh ba u la leh ia ki kam thok kam shukor da kaba u la ujor ruh pyrshah ia ki nongtrei Khasi, da kaba u la kynnoh bad ki tuh ki thiem, hynrei ki la ong pat ba ynda la tohkit ki pulit la lap ba ki tiar ba u la kam ba la shah tuh ha ki nongtrei Khasi kim shym la jah satia, hynrei ki don hapoh ka kamra treikam ka jong u hi bad ha kaba iadei pat bad kane u bah Shylla u la ong ba hap ban pynshisha shwa ia kata bad ynda lap ba katei shisha na ka liang jong ka Council kan sa pynduh ban ai laisen ia u.