Hiar jurip u CEM ka KHADC, ba tih khyndew beain ha Pillangkata

Nongpoh:U Bah Pyniaid Sing Syiem, Chief Executive Member (CEM) ka Khasi Hills Autonomous District Council (KHADC) mynhynnin ka sngi, u la hiar dalade ban leit jurip ïa kawei ka jaka tih khyndew beain jong u riew shimet ha kawei ka jaka kaba hap hapoh ka shnong Pillangkata, kawei na ki shnong khappud hapdeng ka Meghalaya bad Assam.

Katei ka jingleit jurip da u CEM ka KHADC, ka dei hadien ba u la ïoh jingtip, ba la don katei ka jingpyntih khyndew beain ha katei ka jaka, ha kaba na ka liang ka District Council, ki la phah ia ki briew ban leit tohkit bad phah da ka Show Couse Notice bad kiba la Maham ruh ïa u ba u dei ban sangeh noh ka jingpyntih khyndew beain ha katei ka jaka, hynrei kaba la pynlong ia u CEM ka KHADC, ban hiar hi dalade, ka dei hadien ba u la ïoh jingtip ba utei u briew u bteng beit ban tih khyndew beain bad shalan sha Assam ha ki por mynmiet.

Haba kren sha ki lad pathai khubor, u Bah Pyniaid Sing Syiem, u la ong ba hadien ka jingleit jurip, u la maham ia utei u briew ba pyntih khyndew, uba la tip kum u Billu Taro, ba u dei ban sangeh noh shi syndon ban tih khyndew beain bad lada lap ba un bteng biang ia katei ka kam tih khyndew beain, na ka liang ka District Council, kan sa ujor sha ki Pulit bad ki Bor District ka Ri Bhoi.

Ha katei ka sngi, ba u CEM u la leit ban jurip ïa katei ka jaka tih khyndew, la sakhi da ka jingdon ki Majistor bad Pulit Ri Bhoi, nangta la synran ruh da ki nongialam bad dkhot ka KSU bad HNYF na Ri Bhoi.