Nongpoh: U Raja Brahma, Border Magistrate ka Ri Bhoi, mynta ka sngi u la hiar sha ka shnong Ummat, ban leit tohkit halor ka jingkynnoh kaba la mih na ki riew paidbah jong katei ka shnong, kiba la kynnoh ba u Rupsing Teron, MLA ka Chingthong MAC Constituency, ha ryngkat ki Pulit Assam, ki la wan ban kurup ia ki Pipe um kiba don ha katei ka shnong, kiba dei ruh ki Pipe kiba la pynmang na ka bynta ban pyntrei ia ka Jal Jevan Mission ka skim sam umbam sha ki thliew iing kiba don ha katei ka shnong.
La ong ba katei ka jingjia ba shah kurup kitei ki pipe um ha Ummat, ka la jia ha ka sngi kaba utei u MLA Chingthong MAC Constituency, ha ryngkat ki Pulit Assam, ki la wan ban jurip ia ki shnong khappud ha katei ka thain, hynrei haba ki la lap ia kitei ki Pipe um kiba don ha katei ka shnong, la ong ba utei u MLA, u la btah ia ki Pulit Assam ba ki dei ban kurup ia kitei ki Pipe, halor ka jingkynnoh ba kitei ki Pipe ki dei kiba beain jong ka Meghalaya bad kiba la wan ban pynhap beain hapoh ka jaka jong ka Assam bad kaba hapoh ka West Karbi Anglong.
Dei halor katei ka nongrim bad ban tip ia ka jingshisha halor katei ka jingwan kurup ki Assam ia kitei ki Pipe Meghalaya, u Raja Brahma lem bad ki Pulit Ri Bhoi, ki la hiar ban leit tohkit, da kaba kynduh ia ki nongialam shnong lem bad ki riew rangbah, kumta ha ka jingiakren la lap ba kitei ki pipe um kim dei kiba la wan rah beain da ka sorkar Meghalaya, hynrei ki dei ki pipe um ba la pynpoi da ki Contractor ban pyntrei ia ka skim sam umbam sha ki iing kiba don ha shnong Ummat lyngba ka sorkar Meghalaya.
Haba iadei bad katei ka jingwan kurup ki Assam ia kitei ki Pipe ban pyntrei ia ka skim sam umbam JJM ha shnong Ummat, u Border Magistrate ka Ri Bhoi, u la ioh ban iakynduh bad ki Pulit ka Assam ryngkat ki nongialam Shnong ka Ummat bad na kaei kaba lap ha katei ka jingtohkit yn sa phah ia ka kaiphod sha ka Deputy Commissioner ka Ri Bhoi, khnang ba kin leh ia kaba donkam hapdeng ki para heh ka Meghalaya bad Assam.
Nga sngew nguh shi kat dei eh ia i sir brama ba i la shim khia shisha ban leit jurip mar dor haba ki paid khasi khara jong ngi kiba sah ha block2 ki ia kynduh jing eh.khu blei shibun sir ia kapor ba kor dor jong phi.bad ngi iohi ba phi don shisha iaka mynsiem ban trei naka bynta u paidbah. 🙏🙏🙏