Hiar jurip ki sengbhalang bad ka NHAI ia ka Jingkieng Dwarksuid

Nongpoh: Ban lap ia ka jingshisha bad ka jingma kaba ap ia ki paidbah halor ka jingsynjor ka Jing kieng iaid kali ha Dwarksuid Shillong By-Pass, kaba don hajan ka shnong Umroi ha Ri Bhoi, myn hynnin ka sngi ki nongialam ka Hynniewtrep People Federation (HPF) Seng kmie, nangta na ka FKJGP, North Khasi Hills District lem bad ki nongialam shnong ka thain Umroi-Bhoirym bong, ki la leit ban jurip ia katei ka jingkieng iaid kali kaba don ha katei ka jaka.

Ha katei ka jing leit jurip, nalor kitei ki dkhot sengbhalang, la sakhi ruh da ka jingdon ki briew ka National Highways Authority of India (NHAI), kiba la leit ban jurip ia katei ka jingkieng bad kiba la lap shisha ba katei ka jingkieng ka la don shisha ka jingorpait ha kiba bynta ba shapoh katei ka jingkieng kaba la tei naduh u snem 2009.

Kiba la donlang ha katei ka jingleit jurip, ki kynthup ia u Bah Gordon Khongsit, President Sengkmie, Bah Apbor Nongrum, president Ri Bhoi, u Bah Bishar Dhar, president ka FKJGP, NKHD, u Bah Kronding Nongbsap u samla ka thain Bhoirymbong lem bad kiwei kiwei.

Haba kren sha ki Nongthoh Khubor hadien ka jingjurip, ki nongialam ka HPF kiba kynthup ia u Bah Apbor Nongrum bad u Bah Kronding Nongbsap, ki la pynpaw ia ka jingsngewkhia halor ka jinglong jingman hapoh katei ka jingkieng bad kaba la wanrah ia ka jingbym shngain na bynta ki paidbah kiba pyndonkam ia katei ka jingkieng bad ia ka surok Shillong Bypass.

Na ka liang u Bah Bishar Dhar, President ka FKJGP ha Ri Bhoi, u la ong ba katei ka jingkieng Dwarksuid, ka dei kaba la tei da ka NEC ha u snem 2009 hynrei ym da ka NHAI, hynrei kaba lyngngoh ka long ba ka jingkieng ba dei ban tei da ka NHAI ha ka por ba tei ia u surok Shillong Bypass ha kaba wat ia ka jaka ruh la dep thied ia kata ka jingkieng ym shem la tei satia haduh kine ki sngi.

Na kaei kaba la lap ha katei ka jingleit jurip da kitei ki sengbhalang bad ki briew na ka NHAI, la iohi ba ha katei ka jingkieng, ki la don ki katto katne ki bynta kiba la orpait bad kiba lah ban wanrah jingma ia katei ka jingkieng, katno tam ba katei ka jingkieng, ka dei kawei na ki jingkeing kaba donkam bha hapoh ka surok Shillong By-pass.