Hiar jurip ki ophisar, saiantis bad enjiniar ka MSPCB ia ki Karkhana ba pynmih tdem ha Byrnihat

Nongpoh, 20 Lber: Ki ophisar na ka Meghalaya State Pollution Control Board (MSPCB), ha ryngkat ka jingdon ki Saiantis lem bad ki enjiniar, mynta ka sngi ki la leit ban jurip ia ki katto katne tylli ki Karkhana kiba don ha ka thain Byrnihat.

Haba iadei bad katei ka jingleit jurip ia kitei ki Karkhana, la ialam da u Dr. G.H Chyrmang, MFS Member Secretary, nangta ha ryngkat ka jingdon u Bah S. Swer Sr. Scientist, u Bah YF laloo, Environmental Engineer lem bad kiwei ki saiantis lem bad ki nongtrei jong ka MSPCB.

Haba kren sha ki lad pathaikhubor, u Dr. G.H Chyrmang, u la ong ba katei ka jingleit jurip jong ki ia kitei ki karkhana, ka dei katkum ka jingbthah na ophis u Commissioner Secretary jong ka sorkar jylla, ha kaba la btah ia ki ban kin leit ban jurip halor ka jingpynmih tdem jaboh da ki Karkhana kiba don ha Byrnihat.

U Dr. G.H Chyrmang, u la ong ruh, ba katei ka jingleit ban jurip ia ka jingpynmih tdem jong kitei ki Karkhana ha Byrnihat, ka dei ruh hadien ba ka Byrnihat, ka la paw syndon ba ka la dei kum kawei na ki jaka ba jaboh tam ka lyer ha ha ka pyrthei hi baroh kawei.

Shuh shuh, u Dr. G.H Chyrmang, u la ong ba kumba ka long mynta na ka liang ka MSPCB, kan ym shah ia ki Karkhana ba kin pyntreikam ia ki Karkhana jong ki, lada kim don ia ki tiar ki ban tip halor ka jingpynmih lyer jaboh bad kiba la tip kum kita ki Pollution Control Device (PCD).

“Kumba ka long mynta, haba ngi leit ban jurip ia kito ki Karkhana kiba heh, ngi leit ban jurip ha ryngkat ka jingdon ka kynhun ba kyrpang kaba ngi la jer kum ka Task Force, hynrei haba ngi leit ban jurip ia kito ki Karkhana kiba kham rit, ngi phah da ki briew jong ka MSPCB” ong u Dr. G.H Chyrmang.

Haba iadei bad ka jingthmu ban tehlakam ia ka jingpynmih jaboh da ki Karkhana ha Byrnihat, u Dr. G.H Chyrmang, u la ong ba kumba ka long mynta, ki dang don tang ia ki tiar kiba peit ia ka jingjaboh ka Lyer, ia kaba ki lah wat ban peit online, hynrei mynta pat ki la pyrshang ruh ban wanrah sa ia kita ki tiar kiba lah ban tip halor ka jingpynmih jaboh ki Karkhana bad kiba pyntuid sha ki wah.