Hiar jurip ki MLA, MDC bad ki heh nongialam ka Congress Ri Bhoi, ia ka Building ba pynieng beain ka Assam ha Khanapara

Nongpoh: Ki heh nongialam ka Ri Bhoi District Congress Committee (RBDCC), hynnin ka sngi ki la leit ban hiar jurip ia ka Transit Camp kaba la pynieng da ka sorkar Assam lyngba ka tnat Transports, kaba la pynieng beain ia kawei ka Building ha Khanapara, kaba dang hap hapoh ka shnong Khanapara, Raid Marwet, Ri Bhoi District.

Nalor ka jingleit jurip ia ka Transit Camp ha Khanapara, kitei ki heh ka RBDCC, kiba kynthup ia u Bah Mayrald Born Syiem, President ka RBDCC bad uba dei ruh u MLA Nongpoh, nangta u Bah George B. Lyngdoh, MLA Umroi, u Bah Balajied Rani, MDC Nongpoh, u Bah Charles Marngar, MDC Mawhati, u Bah M.G Kharshanlor, Secretary ka RBDCC lem bad kiwei ki heh nongialam ka Congress ha Ri Bhoi, ki la leit ban jurip sa ia ka Facilitation Centre (Entry Point) kaba don ha Umling bad hadien kata, ki la leit ban kynduh ia ka Deputy Commissioner, Ri Bhoi, na ka bynta ban pyntip sha ka, halor kaei kaba ki la lap na katei ka jingleit jurip jong ki.

Haba iadei bad ka jingleit jurip ia ka Transit Camp ha Khanapara, kitei ki heh ka Congress, lyngba u Bah Mayrald Born Syiem, u la ong ba ka nongrim kaba la pynlong ia ki ba kin leit jurip ia katei ka jaka, ka dei hadien ba ki la ioh jingtip ba ka KHADC, ka la phah jingthoh sha ka sorkar Assam, ba ki dei ban pynsangeh noh ia katei ka Building, namar katei ka jaka ka dang hap hapoh u pud u sam ka Meghalaya, hynrei la shu wan tei beain da ka Assam, khlem da iohbor na ka KHADC ne na u Syiem ka Raid Marwet.

Ha kawei ka liang, kum ka party ngi sngewkhia eh ban iohi ban iohi ba ka jingtei ia katei ka Building, ka la iaid shaid shaid bad mynta sa tang ban dep hi, namar ka kam la lah ban pyndep haduh 70-80%, hynrei na ka liang ka sorkar jylla kam shyem la leh ei ei, na ka bynta ban iakren sha ka Assam bad ban pynsangeh noh ia katei ka Building, bynrap u Bah Mayrald Born Syiem.

Haba iadei bad ka jingleit kynduh DC, u la ong b aka party ka kyrpad ia ka DC Ri Bhoi, ba ka dei ban shimkhia bad ban pynsangeh noh ia katei ka jingtei, hynrei ym tang katta ka party kan sa leit ban kynduh ia u Myntri Rangbah ka jylla, na ka bynta ban iakren halor ki pud ki kam sam bad khamtam eh halor katei ka jingwan klun jaka ka Assam ha Khanapara bad kaba la pynieng syndon da ka Building.