Nongpoh: Ki heh Nongialam Seng jong Saw tylli ki kynhun Sengbhalang, kiba kynthup ia ka KSU, FKJGP, HNYF bad RBYF, mynta ka sngi ki la leit ban jurip ia ka Entry Point kaba don ha Umling Ri Bhoi District.
Ha katei ka jinghiar jurip kitei ki saw Seng, la iohi ba baroh ki heh Nongialam jong kitei ki saw Seng, kiba kynthup naduh u Samla Lambokstarwell Marngar, President ba rangbah ka KSU, nangta u Bah Welbirt Rani, President ka FKJGP, u Bah Sadon K. Blah, General Secretary ka HNYF bad u Bah Bipul Thangkhiew, President ka RBYF.
Tang mar ia ioh jingtip halor katei ka jinghiar ki sengbhalang, la iohi ba ki bor District bad Pulit ka Ri Bhoi, ki la hiar mar mar sha katei ka jaka, na ka bynta ban tehlakam ioh mih kino kino ki huri hura. Kitei ki heh Nongialam Sengbhalang, ki la hiar sha katei ka jaka da kaba jai jai bad ym shym la don kano kano kaba leh pyrshah, hynrei ki la shu leit ban jurip ia ka rukom trei hapoh katei ka Entry point.
Haba kren sha ki Lad Pathaikhubor, kitei ki heh Nongialam, ki la ong ba katei ka jinghiar jurip jong ki, ka long ban buddien halor ka jingpyntrei ia katei ka Entry Point, kaba iadei ruh katkum ka jongkular da u Myntri Rangbah ka sorkar jylla, uba la kular ba un pyndep noh hapoh 60 sngi ia katei ka Entry Point. Nalorkata, ki la pynpaw ruh ia ka jingsngewkhia halor ka jingkular kai ka Sorkar Pdeng haba iadei bad ka jingthmu ban pyntreikam noh ia ka Inner Line Permit (ILP) hapoh ka jylla, namar wat haba baroh ki 60 ngut ki MLA hapoh ka jylla ki la phah ia ka Resolution sha ka Sorkar Pdeng ban pyntreikam noh ia ka ILP mynta la jan dap shisnem, hynrei kat haduh mynta ym pat la iohi dak eiei ruh em.
Ki la kyntu ia ka sorkar ba kan pynkloi noh ha ka ban pyndep noh ia ka entry point bad ruh ban pyntreikam ia ka MRSSA 2016, khnang ban iada ia ka jaid bynriew na ka jingshah tyllep ha ki briew kiba nabar.
Phi don ban ong eiei?