Nongstoiñ: Hadien ka jingud jingnam jong ki paidbah nongshong shnong ka thaiñ Nonglang halor ka jingbym biang ka PHC kaba don ha ka shnong Nonglang West Khasi Hills District, ha kaba iadei bad ka jingbym don tikna u Doctor bad ruh halor ka jingbym lah ban ai jingsumar ia ki longkmie kiba kha khyllung na ka liang jong ka Seng Hyññiewtrep Youth Council Langja Area Unit hapoh ka jingialam jong u Samla Saiñborlin Syiemlieh, mynta ka sngi ba ar jong ka taiew ka 23 tarik u Naitung ki la hiar sha katei ka PHC ban pynlong ia ka jingleit jurip.
Ha katei ka jingleit jurip ia katei ka PHC ha Nonglang, na ka liang jong ka Seng ka la lap shisha halor ka jingbymbiang jong katei ka PHC kaba la paw tyngkreiñ ba katei ka PHC ka long kaba thylli bad kaba suda bad ym shym la don satia u Doctor, hynrei la shu don tang ki katto katne ngut ki nongtrei kynthup ia ar ngut ki Nurse.
Kaba la pynlyngngoh ruh ia ki dkhot jong ka Seng ka long ba kat ka jaka ai jingsumar ha katei ka sngi bala leit jurip ym symla lap satia wat tang u wei ruh u nongwan shim dawai lane ki nongpang ban shah sumar ha katei ka PHC bad la ioh jingtip ruh ba ki paidbah katei ka thaiñ kim sngew myntoi ban leit sha katei ka PHC ha ki sngi bym don Doctor namar ba bunsien kim ju ioh ia ki jingdonkam ka jong ki kum ki nongpang bad ki nongleit shim dawai.
Haba iakren bad ki nongthoh khubor hadien katei ka jingjurip na ka liang jong u samla Saiñborlin Syiemlieh, u la ong ka jingwan jong ka Seng ban jurip ia katei ka PHC ka dei hadien ba ki la ioh pdiang ia shibun ki jingujor na ki paidbah ha kaba ka seng ka la lap ia ki jingshisha, namar ha katei ka sngi u Doctor u ba dei peit ia katei ka PHC um shym la don satia bad u la ong ruh ba katkum ka jingioh jingtip jong ka Seng ba u Doctor u ju wan tang ar sien ha ka shitaiew kata ha ka sngi Blang bad ha ka sngi Palei.
Shuh shuh u la ong ruh ba ki paidbah ki ju ud ruh ba bunsien ki longkmie kiba kha khyllung haba ki leit sha katei ka PHC kim ju ioh satia ia ka jingsumar, namar ba bunsien la shu phah noh ia ki ba kin leit sha Nongstoiñ kaba long pat ka jingeh ia kiba bun ki longkmie jong katei ka thaiñ ban leit shaduh sha Nongstoiñ bad ha kajuh kapor u la ong ruh ba ym lah ban len ki don ar ngut ki Nurse kiba peit ia katei ka PHC kiba trei shitom na ka bynta u paidbah hynrei haduh katno eh kin lah pat ban ai jingsumar khamtam ia ki jingshitom kiba eh lada ym don u Doctor.
Kumta na ka liang jong u tei u nongialam jong ka Seng u la ong ka Seng kan sa pyrshang ban leit ia kynduh bad ban iakren ia ki bor kiba halor ha kaba iadei bad katei ka bynta bad ha kajuh kapor ka Seng ka la dawa ruh na ka sorkar ba ka dei ban kyntiew kyrdan noh ia katei ka PHC kaba ai jingshakri ia palat 35 tylli ki shnong jong katei ka thaiñ ha ka jingdon briew kaba la kot palat ia ka 10 hajar eiei.
Na ka liang jong ki dkhot jong ka Seng ki la pyrshang ruh ban iakren bad iwei na ki Nurse I ba don ha katei ka PHC, ha kaba na ka liang jong Itei I Nurse I la iathuh ba u Doctor u don sha Nongstoiñ, namar ba u leit sha ka jingialang ba la pynlong da ka tnad jong ka koit ka khiah hapoh Nongstoiñ.
Phi don ban ong eiei?