Nongpoh, 17 Iaiong:
Shi bynta ban peit lem ia ka jingeh jong ki khynnah skul, ki nong ialam ka FKJGP North Khasi Hills District, ha ryngkat bad ka Umling circle, myn ha ka sngi Thohdieng ki la pynlong ia jingleit ban jurip ia ka skul Jawahar NV, kaba don ha shnong Niangbari Ri Bhoi District.
Ha katei ka jingleit ban jurip ia katei ka skul, la ialam da u samla Luistar Lyngdoh, uba dei u Chief Organizer ka FKJGP, North Khasi Hills District, ha ryngkat u Bah George Tangsang President ka FKJGP, Umling Circle, u Publicity Secretary ka FKJGP, North Khasi Hills District, Bah Ricky Majaw, lem bad ki katto katne ngut ki dkhot jong ka seng.
Ki nongialam jong ka FKJGP, ha kaba nyngkong eh ki la leit ban iakynduh ia u DS Roa Principal jong ka skul JNV, ban kylli halor kino ki nongrim kiba ki khynnah skul ki iakynduh jingeh, ha kajuh ka por ki la kylli ruh na u halor ka jingduna jong ka bam ka dih, ka um bad ka jingdon jong ka jingiashoh iadat hapdeng jong ki para khynnah skul.
Hadien ka jingiakynduh ia u Principal, ki nongialam ka seng ki la iakynduh pat sa ia ki khynnah skul bad ha kane ka jingiakynduh ia ki khynnah skul, ka la don ka jingiaphyliew hapdeng ki khynnah skul bad ki nongialam ka FKJGP, na ka bynta ban wanrah ia ka bha ka miat ha katei ka skul. Ha kane jingiaphylliew jingmut ki nongialam ka seng ki la iohsngew ia ka jingeh kaba ki khynnah jong katei ka skul ki iakynduh.
Ha kane jingiaphylliew jingmut bad ki nongialam ka seng, ki khynnah ki la ong ba ha kane ka skul, kam don kata ka jingiashoh iadat jong ki para khynnah skul bad ka jingpyniaid ia ka skul ka long kaba iaid beit iaid ryntih, la ka long ha ka liang jong ka bam ka dih bad kiwei kiwei, hynrei ka jingeh kaba ngi mad khamtam ha ka por rangtyrkhong ka dei tang ha ka liang jong ka Um.
Hynrei tang kawei kaba ngi kum ki khynnah skul ngi sngewdiaw bad kata ka dei halor jong ka jingbymdom ka Madan ialehkai ba paka, namar ka madan kaba ngi don mynta ruh ka long kaba rit bad khapngiah lada ngi ialehkai para khynnah skul, ka long ka jingeh kaba khraw ba ngin ialehkai ha kawei ka madan rit, namar kumba ka long mynta ngi don kumba 310 ngut ki khynnah shynrang.
Mynta lei ngin hap ban leit shim bynta sha ka Regional Level, kaba dei ka jingialehkai sport jong ki skul JNV na ki jaka bapher bapher, hynrei katno ngi dap da ka jingsngewkhia kaba khraw, ha kaba ngi hap ban leit iakhun sha katei ka lympung khlem kano kano ka jingpynkhreh tang namar bym don Madan kaba biang.
Kumta halor jong kitei ki jingeh kumba la pyni da ki khynnah skul jong ka JNV Niangbari, na ka liang ki nongialam jong ka seng ki la kular ban shimkhia da kaba iatreilang naduh ki Nonghikai bad ki khynnah skul ruh kumjuh, na ka bynta ban wanrah jingmyntoi ia katei ka skul kaba don ha Niangbari.
Haba kren bad ki nongthohkhubor halor jong kane ka phang, ki nongialam ka seng ba kynthup ia u Luistar Lyngdoh, George Sangsang bad u Ricky Majaw, ki la ong ba ka daw kaba la pynlong ia ki nongialam ka seng ban leit jurip ia katei ka skul, ka long khnang ba kin tip ia ka khia ka shon bad ka jingeh kaba naduh ki khynnah skul bad nonghikai ki iakynduh.
Khatduh khatwai ki nongialam ka seng ki la ai ruh ia ki jingkitbok kitrwiang ia ki khynnah skul, da kaba kyntu ia ki khynnah skul ba kin nantrei shitom bad minot khnang ba kin lah ban wanrah ia u soh jong ka jingjop bad poi sha kliar jong ka nam.
Phi don ban ong eiei?