Nongpoh: Hadien ba la ioh jingtip halor ka jingdon jong ki katto katne ki bar jylla, kiba la wan ban riehtngen da kaba trei ha ki karkhana bapher bapher, kiba don ha ki thain Umsiang ha Ri Bhoi District, hynnin ka sngi Saitjain, ki dkhot na ka seng Federation of Khasi Jaintia & Garo People (FKJGP) jong ka Mawhati Circle, hynnin ka Sngi Saitjain ki la hiar ban jurip ia ki katto katne tylli ki karkhana ki don ha katei ka thain, ia kaba ka seng ka la ioh jingtip ba kitei ki karkhana ki la pyntrei da ki tang da ki bar jylla.
Ki dkhot ka FKJGP kiba dang jurip mynder ha ki kharkhana otdieng kiba don ha ki thain Umsiang:Rupang
Ha katei ka jingleit khynra mynder, la ialam da u Bah Shanlang Diengdoh, President ka FKJGP Mawhati Circle, ha ryngkat ka jingdonlang lem bad ki nongkitkam bad ki dkhot na ki Unit bapher bapher. Hynrei sniew bok ha katei ka jingleit khynra ki nongialam ka FKJGP, kim shem la iohbat wat tang uwei ruh, ha kaba kum ka seng ka la suba ba kitei ki bar jylla kiba la trei ha kitei ki karkhana ki la phet rieh na kitei ki karkhana.
Haba kren sha ki lad pathaikhubor, u Bah Shanlang Diengdoh, u la ong ba ka daw kaba la pynlong ia ka seng ban shim ia kane ka sienjam, ka dei hadien ba ka seng ka la ioh jingtip ba ki don don bun ki mynder kiba la wan ban long kum ki nongbylla ha kitei ki karkhana bad dei na kata ka daw kaba ka seng ka la shim ia kane ka sienjam ban khynra na ka bynta ban lap ia ka jingshisha la ki dei kiba don kot don sla ne kiba wan bylla tang ban pynlong kum ka jaka rieh tngen.
Ka seng ka la ioh jingtip ba ki bun bha ki mynder kiba la wantrei ha ki karkhana otdieng kiba don ha kane ka thain, hynrei ngi lyngoh pat ba balei ha kane ka sngi kaba ki wan ban khynra ngim shem la lap wat tang uwei ruh, ha kaba ka la pynsuba pynban iangi ba ka lah ban don pynban kaei re kaei sha lyndet, bynrap u Bah Shanlang Diengdoh.
“Kane ka thain ka dei kaba jan bha bad ka Assam, ha kaba lyngba jong kane ka thain la pyniasoh ruh ia ka surok na Patoli Jagiroad bad mih sha Umsning, ha ka la long ruh ka kaba kaba khraw ia ki mynder kiba kwah ban wan rieh tngen sha ka jylla, da kaba shimkaba ia ka jingbymdon kiba talasi lane khynra ia ki ha ka jaka kaba ki trei ki ktah” ong u Bah Shanlang Diengdoh.
Ha kane ka jingwan khynra mynder ha kine ki karkhana, ngi lap pynban ba kine ki karkhana otdieng nalor ba ki pyntrei da ki bar jylla, hynrei ki dei ruh ki karkhana beain bad ki bym biang ia ki kot ki sla, namarkata ngi kyntu ia ka sorkar ba ka dei ban shimkhia ia kine ki karkhana beain kiba don ha kane ka thain.
Khadduh eh, ka seng ka kyntu ruh ia ka sorkar jylla ban ka dei ban buh briew ha katei ka surok kaba la pyniasoh ia ka Assam bad Meghalaya, namar ka seng ka artatien ba ha kaba kum kane ka por ba ka Assam ka la pynbna ia ka jingdon jong ki 40 lak tam ki briew ki bym don ha ka thup jong ka NRC, ha kaba ka seng ka sheptieng ioh kitei ki bym don ha ka thup jong ka NRC kin sa wan ban rungtuh sha kane ka jylla da kaba shimkabu ia ka jingbym don kiba talasi na katei ka surok, u la bynrap.