Hiar ialap elekshon u bah Prestone bad ki UDP, sha Nongjri Mawkliaw

Shillong: Myn hynnin ka sngi, u Symbud Myntri Rangbah ka jylla u Bah Prestone Tynsong u la hiar sha shnong Mawkliaw bad Nongjri ban ialap elekshon na ka bynta u kyrtong ka UDP u Bah Balajiedkupar Synrem bad u la kyntu ia ki paidbah ban jied ia u Bah Balajiedkupar Synrem kum u MLA bathymmai jong ka Shella Constituency.

Haba kren ha kitei ki jingialang, u Bah Prestone uba dei ruh u National Vice President ka NPP u la ong, ka NPP ka burom ia u (L) Dr Donkupar Roy namar u la maitphang ha kaban thaw iaka sorkar Meghalaya Democratic Alliance (MDA), bad ka NPP kum ka dak jong ka jingburom ia u Dr Donkupar, kala shim iaka rai ban ym pynieng kyrtong ha Shella Constituency hynrei kan ai jingkyrshan pura ia u UDP khnang ba u khun jong u Dr Donkupar yn jop iaka elekshon.

U la ong, ki paidbah ki la jied ia u Dr Donkupar kum u MLA jongki hynrei une u nongialam ula khlad noh, kumta u la kyrpad ia ki paidbah ban ailad ia u khun jongu, u Bah Balajiedkupar Synrem ba yn mih pli ban long kum u MLA jongki ba yn pyndep iaka samoi treikam jong u kpa jongu bad ban pyndep ruh ia ki kam kiba la maitphang da u Dr Donkupar Roy.

Na ka liang ki nongialam ka UDP bad u kyrtong ka UDP u Bah Balajiedkupar, haba kren ha kitei ki jingialang, kila pynpaw iaka jingsngewnguh ia ki nongialam ka NPP bad HSPDP kiba la ai jingkyrshan pura bad ialap elekshon kyrpang, ban pynthikna ba u kyrtong ka UDP yn jop iaka elekshon shiteng samoi na Shella bad kane ka jingjop kan nang pynkhlain shuh shuh iaka sorkar MDA kaba la ialam da ka NPP.
Ha kitei ki jingialang la ioh iaka jingkren na u President ka UDP u Bah Metbah Lyngdoh, ki Myntri Sorkar na ka seng UDP kiba kynthup ia u Bah Lahkmen Rymbui bad u Bah Kyrmen Shylla bad la iadonlang u CEM ka KHADC u Bah Teinwell Dkhar, u MLA ka UDP na Ranikor u Bah Pius Marwein bad kiwei kiwei.
Nalor kane, ka UDP kala pynlong ruh iaka jingialap elekshon ha Kut Madan, Sohra bad la ialap elekshon da u Myntri Sorkar uba na ka seng UDP u Bah H Brolding Nongsiej, u Deputy CEM ka KHADC u Bah Pyniaid Sing Syiem uba na ka seng NPP, u President ka HSPDP u Bah KP Pangniang, u MDC ka Sohra u Bah Titostarwell Chyne, u MDC barim ka Umsning u Bah Donkupar Sumer bad kiwei kiwei.