Shillong:Ki nongrep sohsaw, ki ia lynniar ha kine ki sngi bad ka daw ka long namar ba ka la hiar kynsan ka dor jong u sohsaw, sha ka T.2 bad T.3 shi kilo. Une u nongthoh khubor, u la lap ia u sohsaw, uba la shu phriang ha rud surok ha Wahiajer, ha kaba la antad ba ula don da ki phew kali, uba dei ban shalan shabar Jylla, hynrei la iathuh ba ka jingdie ha kane ka taiew ba ladep, ka la hiar shi katdei.
Ka kong Rememberme Phawa, kaba ju shalan sohsaw na Wahiajer sha Siliguri, Bangladesh, Silchar, Badarpur bad sha kiwei ki Jylla jong ka India, ka iathuh ba ka jinghiar dor, ka long kaba la palat ha kine ki khyndiat sngi ba ladep bad kaba kam shym la mutdur satia. “Man ka por ngi lah ban die 15-20 kali shi taiew, mynta tang 5-10 kali ruh ym don ba thied” ka la ong shuh shuh ha ka jingiakren bad U Rupang.
Haba la kylli ia ka daw jong ka jinghiar kynsan jong ka dor, ka kong Phawa, ka shim ba ka daw, ba kongsan, ka lah ban dei ba mynta ka la dei ka por pynmih sohsaw sha ki jaka bapher jong ka Ri India bad sha Bangladesh ruh kumjuh bad kumta ka jing wan thied sohsaw na sha Wahiajer, ka la hiar haduh katta katta.
La iathuh ba ka Shnong Mynsngat, ka dei ka shnong kaba pynmih shibun bha u sohsaw ha Jaintia Hills.
Kaba lyngngoh pat ka long, ba wat la ka dor jong u sohsaw, ka long tang T.3 shi kilo ha Wahiajer, hynrei une u nongthoh, ula kylli dor ia u sohsaw na ki dukan ha Shillong, hynrei la lap ba ka dor ka long hapdeng T.30 haduh T.40 bad T.50 shi kilo, katba kum ka jingbha jong ki soh.