Hiar dor ka sla tyrpad

Shillong, 7 Rymphang:
Ka dor ka sla tyrpad, ka la hiar tyngeh mynta u snem, ha kaba ka dor jongka, ka long tang T.16 lane T.17 shi kilo lane kaba long T.1,600 lane T.1,700 shi kwintal, kata ruh ka sla thymmai, hynrei kaba la set slem lei ha kudam, ka poi sha ka T.12 shi kilo.
Ki nongrep na Nongsohphan, kaba hap ha Raid Lyting, ki kyrpad ia ki nongmihkhmat jongki, ba kin iasaid lem na bynta kane ka jingeh jong ki nongrep, namar kane ka jinghiar ki dor ki dur, kaba la ktah shi katdei ia ka kamai jakpoh jongki. La iathuh ba ka Nongsohphan, ka lah pynmih antad, kumba shi hajar kwintal eiei ka sla tyrpad ha ka shisnem. “Bun kiba sangeh ban ngor ia ka sla tyrpad na ki bri ki bsah jongki, namar ka jinghiar palat ka dor” ong u nongrep, haba iakren bad U Rupang.