Shillong, 13 Jymmang:
Watla ym tip thikna ia ka jaka ba pynlong ia ka jingmane ksuid kumba la iapur khana ki briew, hynrei katkum ka jingioh sngew ki briew ki la ia kren iakhana, la don bun ki jaka ba pynlong ia kum kane ka jingmane ksuid ha ki bynta jong ka nongbah Shillong bad ki jaka ba marjan jongka.
Don kiba iathuh ba ki don ha ki katto katne ki jaka jong kane ka nongbah bad ha ki jaka kham kyn dong ruh ha kaba la pynlong ia ka jingduwai ne mane ha ka por janmiet.
Ka jingmane ym shym la tip ha kano kano ka kynhun niam ne kyr teng jong ka Balang hynrei la shu duwai katkum kata ka jingkhot ba la wan paw ha ki. Don pat kiba iathuh ba ka la don ka jingthmu ban seng da ka kynhun Balang hynrei ia mynta, kim pat ai kyrteng namar ba ki dang don ha ka jingpyrkhat.
La don kiba ia pur khana ba haba ki leit sha jaka ba pynlong ia ka jingduwai jong ka kynhun, ki iohsngew ia sur jingkren ka bym lah ban batai haduh ba kim nang ioh thiah ioh dem shuh haba ki wan phai sha iing namar ba ki la ioh sngew ia ka sur bym lah ban batai ha ka jingmynsiem jongki kaba pynngiew.
Ka la don ka jingher ka khubor ba ki briew kiba don kane ka jingngeit, ki leit ban pynlong ia ka jingduwai ha ki lum jingtep ha ka por mynmiet kiba don ha ki katto katne ki bynta jong ka nongbah, bad kawei na kine ka dei ha lum jingtep kaba don ha Motinagar. La iathuh ba kiba leit ban pynlong jingduwai, kin hap ban buk dak ha ka met bad phong da ka jain iong.
Haba u nongthoh khubor u la twad jingtip halor kane na ki briew sharum shaneng, bun ki la pynpaw ba kim da tip ia kane hynrei ki shu ioh sngew narum naneng na ka jingiapur khana jong ki briew hynrei kim tip kaei ka kyrteng jong kata ka Balang ne haei ki don ka iingmane.
Hynrei ki don pat kiba ong lehse ka dei tang ka jingkynnoh jong ki briew namar ba wat ia u Blei ruh ki dang don kiba bein, hynrei ia u briew lei kim salia ban thaw ktien.
Don kiba iathuh ba ka jaka pynlong ia ka jingduwai ka don ha ka ki khlaw jong ka thain Pohkseh, thain Mawlai, thain Barik,hynrei haba wad jingtip ym pat ioh kaba thikna halor kane.
Kane ka jingmih ka khubor shaphang ka jingmane ksuid, ka la pynlong ruh wat ia u Deputy Commissioner ka East Khasi Hills u Sanjay Goyal u la pynher shithi sha ki khlieh nongsynshar shnong, ki Balang ban shim khia ban iada lada don kano kano ka jingjia kaba kum kane kaba lah ban ktah ia ka jingsngew ha ka imlang sahlang.
Phi don ban ong eiei?