Her Delhi biang U Bah Lapang, na ka jingiakhih ia U Mukul

Shillong, 05 Jylliew:
Ka jingialeh pyr shah jong ki MLA ka Congress ban pynkhyllem ia u Mukul Sangma na ka shuki Myntri Rangbah ka dang iaid haduh mynta watla kim pat thikna la kin lah shisha ne em ban pyn urlong ia ka jingkwah jongki. Ka khubor ba la iohlum, la iathuh ba u president ka MPCC u Bah DD Lapang u leit Delhi biang ban iakynduh ia ki nongialam ka AICC halor ka kynrum kynram ka party ha kane ka jylla.
Ka jingleit leit tied jingkhang khah khah jong u Bah Lapang sha ka AICC ka long kaba don kam hadien ba ka AICC ka la don ka jingthmu ban thung ksiang noh da uwei hadien ba u V. Naraya nasamy u la shah bynshet ban shimti noh ia ka kam nongialam ha Pudecherry. Ka jinglong ka sain pyrthei, ha ka jylla kam long kaba shai haduh mynta hapdeng ka kynhun jong u Myntri Rangbah bad kiba pyrshah ia u.
Hynrei katkum ki khubor la sngewthuh ba ka rai kaba kin ap kan long beit na ka AICC bad lada ka rai ia kaba kim sngew iahap, ki don ki myntri bad ki MLA kiban lah ban mih syndon na ka seng Congress.Ka Congress ka don 30 ngut ki MLA ha ka iing kaba 60 ngut ryngkat ka jingkyrshan jong ki ar ngut ki MLA ka NCP bad 11 ngut ki MLA shimet. Namar ka jingby iahap jingmut hapoh ka sem Congress, la don bun kiba mutdur ba ka sorkar NDA ba ialam da ka BJP khlem pep, kan sa tangon syndon da u ‘nem President Rule ha kane ka jylla tang shu ioh lad khnang ban weng syndon ia ka Congress ha ka bor.