Heh mynsiem ka Congress, ba pyniasoh ki riew rangbah ha Nongpoh

Nongpoh, 08 Nohprah:
Wat la ka ilekshon ban jied ia ki nongmihkhmat (MLA) ka dang sah sa shisnem, hynrei la sakhi pat ba ka ka jingpynkhreh ia kane ka ileksion ka la sdang ha them Ri Bhoi, ha kaba kum kane la sakhi ruh ba hynne ka sngi kumba san phew ngut ki riew paidbah ki la leit ban pyniasnoh ban ai jingkyrshan ia ka party Congress, ia kaba la pdiang burom ruh ia ki ha ka jingialang kaba kyrpang kaba la long ha D.M Hall, Nongpoh.
Ia kine ki nongkyrshan kiba la pyniasnoh ialade sha ka Congress la pdiang burom da u Bah D.D Lapang, MLA ka Nongpoh Konstituency, lem bad ka jingiadonlang ruh kiwei kiwei ki heh ka party Congress na Ri Bhoi District.
Haba kren pdiang burom ia kine ki nongkyrshan, na ka liang u Bah Lapang, u ba dei ruh u president ka MPCC u la pynpaw ia ka jingkmen kaba khraw halor kane ka jingkloi jong kine ki nongkyrshan ban wan ban pyniasnoh bad ka party, ha kaba u la bynrap, ba kane ka jingwan jong kine ki nongkyrshan ka la nang pynshngain bad pynskhem shuh shuh ia ka seng ha kane ka jingpynkhreh ia ka ileksion MLA ban sa wan.
“Kum ka party kaba heh bad ba la paw hapoh ka Ri hi baroh kawei, ka pdiang burom ia phi kum ki paid nongkyrshan, bad kane ka jinglong kaba kloi jong phi sha ka party, ka la nang pynrhem bad ai jingkyrmen shuh shuh ia ka party ba kan poi sha ka thong ha ka ileksion MLA kaban sa long ha u snem 2018”, ong u Bah Lapang.
Napdeng kine ki riew rangbah kiba la wan ban pyniasnoh sha ka party, ki kynthup ruh ia ki nongialam kiba la kham paw kiba kynthup ia u Bah F. Khymdeit, Bah K. Suting, Bah Anthony Kharnaior, Bah Kolin Klein, Bah Celestine Syngkli lem bad kiwei kiwei.