Heh kyrdan ka Cleaner; ia U Secretary ka KHADC

Shillong, 23 Iaiong:
Kat kum ka jingtip lyngba ka ain wad jingtip, ba la wanrah sha ki nong thohkhubor, da ka Synjuk Seng Samla Shnong (SSSS) kaba pyni ia ki kam ba ki nongtrei KHA DC ki trei, ki kyrdan pule jong ki bad ka sngi ba ki sdang trei ia ka kam la iohi ba ka Cleaner ne ki Peon ki kham heh kyrdan ban ia u Secretary, joint Secretary, Deputy Secretary, Under Secretary sha ka Executive Committee ka KHADC .
U Khliehduh jong ka KHADC u Secretary sha ka Executive Committee u bah Welljune Syiem lieh u la sdang trei ia ka kam Secretary sha ka Executive Committee na duh ka 16 tarik u jymmang, 2008 bad ka kyrdan pule jong u ka dei PU, katba kiwei pat ki Joint Secretary kiba don 4 ngut, 2 ngut na ki dei ki BA bad 2 ngut pat ki PU. Ki don 4 ngut ki Deputy Secretary sha ka Executive Committee bad baroh 4 ngut ki dei ki kynthei bad ka kyrdan pule jong ki ka dei BA, ki don ruh sa 3 ngut ki Under Secretary ka KHADC bad kitei baroh 3 ngut ka kyrdan pule jong ki ka dei PU. Kitei ki dei ki kyrdan pule jong ki nongtrei ba halor jong ka District Council, kumba la pyni ha ka RTI. Nalor kitei ki don sa kiba bat ia ka kyrdan ophisar bad ki kyrdan pule jong ki, ki dei Matrik, PU, BA , kiba hehduh ki dei kiba la pass BA, lait noh ki Majistor kiba don ka kyrdan ka LLB bad kiba la dep BA, don ruh ki MA.
Haba phai pat sha ki kyrdan kiba rit duh kaba dei ka kam Cleaner lane ka kam pynkhuid ia ki ophis, la iohi ba ka kyrdan kaba hehduh ka dei kaba la pyndep ia ka BA , ka dei ka kong Iabianglin Shabong , kaba la sdang trei naduh ka 9 tarik u jymmang, 2012, bad la don sa kawei pat kaba ka kyrdan pule jong ka, ka kham heh ban ia u khliehduh ka District Council ka kong Wandakerlin Lyngdoh kaba la sdang trei naduh ka 11 tarik u nailur, 2002 bad ka kyrdan pule jong ka ka dei BA. Kham hajrong khyndiat ia ka kam Cleaner ka dei sa ka kam Peon, ha ka kam Peon la iohi ba ka don kawei ka Peon kaba la pyndep ia ka BA ka kong Pynhunlin imiong kaba la sdang trei naduh ka 13 tarik u kyllalyngkot, 2006, bad ki don 2 ngut ki BA ka kong Wanrilin Syiemlieh kab ala sdang trei naduh ka 1 tarik u jylliew, 2011; ka kong Wanstep Nongbri kaba la sdang trei naduh ka 15 tarik, u nailur, 2014. La iohi ha ka jingtip lyngba ka RTI ba ka kyrdan kitei ki Cleaner bad ki Peon ki kham heh ban ia u khliehduh ka District Council, bad ki kham heh ia ki Under Secretary sha ka Executive Committee ka KHADC, don pat katto katne ngut na ki kiba kham heh kyrdan ia ki Deputy Secretary sha ka Executive Committee bad kumjuh ia ki joint Secretary sha ka Executive Committee. Lait noh kito kiba trei ha kashari, kiba dei ki nongbishar, kiba don ia ka kyrdan LLB; ka Khasi District Council, kaba don 531ngut ki nongtrei, ka don tang uwei ar ngut duh, kiba wan na ka sobjek Science ne Commerce, katba kum katei ka jingwad jingtip.