La thoh da u Ex.Rev.K.Langrin, Secretary shnong Seiñduli-II, West Khasi Hills District.
Kum uwei na kiba ia don bynta ha ka kam synshar shnong ha nongkyndong nga dap da ka jingsngewkhia ha ka mynsiem haba nga ioh jingtip ba ki la don ki rangbah shnong kiba shim kabu ha ki sngi jong ka lockdown.
Nga la iohsngew ia ka jingud jingnam jong kiba bun ki briew kiba leit donkam kyrkieh, kum kiba leit shim dawai sha Shillong ki la shah pakhang lynti noh ha ki shnong haneng Nongstoin, kiba leit Shallang ki la shah pakhang lynti ha ki shnong harum Riangdo, kiba na ka thaiñ Langja kiba leit Nongstoin ki shah pakhang lynti shuwa ban poi Kriangrin, kiba leit trei sha khlaw ki la shah pakhang lynti lada ki iaid lyngba ia kawei ka shnong.
Kiba la ngat ha ka jingshah pakhang lynti ki iathuh ba ka jinglehmeng jong ki VDP jong kita ki shnong ka long kaba la palat. Ki VDP ki kren kob hana ba ki la ioh ia ka bor kut na u Rangbah shnong ban examine ia ka jingkoit jingkhiah jong kiba leit jingleit bad ban check ia ki car pass. Dei halor kita ba sa mih ka jingkylli – Hato u rangbah shnong u kham khraw ban ia u pulit? Hynrei katkum ka jingsngewthuh jong uba bun balang pat, ban leh ia kita dei tang ki nongtrei jong ka Health department bad ki pulit.
Shuh shuh kaba sngewthamula ka long – Kita ki VDP shnong ki khang lynti tang ia ki rit ki ria bad ki riewduk, katba ia ki heh ki haiñ bad ia ki menriewspah pat ki pyllait free. Kaei kane? Hato kim dei ki riew rhah pisa bad ki riewbamsap? Ko ki VDP shnong bad ki rangbah shnong, wat shim kabu ho ha ka lockdown bad wat shim ia ka bor jong ka aiñ ha la ka kti.
Don pat ki shnong kiba pyrkhing tang ia kiba bieit, kiba shah jem, kiba duk bad kiba ki ki isih. Kata, haba kiba bieit bad kiba duk ki leit jingleit sha kiwei ki district, ynda ki la wanphai sha la shong ki hap shong quaratine 14 sngi. Katba ia kiba la nang la stad bad kiba kham dorbor ki shah free. Kaei kane? Hato kam dei ka jingleh shiliang khmat?
La don uwei u briew uba la ong ia nga, “Balei pastor phim ju wan mih shuh sha Mawthylliang?” Nga la jubab ia u, “Oh! Phim pat tip seh ia ka lockdown, ba hap ban shu shong ha ïing?” Uta u la ong biang ia nga, “Balei, kat ma phi u pastor phi dang tieng ia ki pulit? Hato kham khraw ki pulit ban ia u Pastor?” Te nga la ong ia u, “Me kren kai ne kren shisha ia kata? Lada me kren shisha ngan phun noh ia ki pulit ban wan kem ia me. Balei me kren poh kat ia ki briew jong ka aiñ?” Uta u la pan map, “Map, nga la bakla.”
Kita ki VDP bad ki rangbah shnong kiba la pyrshang ban shim ha la ka kti ia ka bor jong ka aiñ ki dei ban panmap noh kum uta u briew bad kylla bamut noh ioh phin ngat ha ki jingeh. Wat knieh kynthet ia u lathi na kti ki pulit ba phin ioh bom briew, ioh phin sha bom kylla.
Halor ka jingkylli hato u Rangbah shnong u kham khraw ban ia u pulit? Ans- Hooid kham khraw u Rangbah shnong ban ia u pulit. Lada phim ngeit ne artatien ko nongai/nongthoh ia kane ka khubor sa kylli pat kumno ne balei u kham khraw te ngin sa ai jubab biang da kaba shai. khublei.