“Hato u MLA ka VPP um don bynta ban mynjur ia ka ILP”, ther u bah Lambor ia u bah Ardent

Shillong: U MDC ka Nongkrem uba dei ruh u MLA barim, u bah Lambor Malngiang u la ther ia u nongialam ka Voice of the People Party (VPP) u bah Ardent M Basaiawmoit uba kynnoh ba ka jingmynjur ka sorkar ia ka Inner Line Permit (ILP), ka dei tang ka jingpynbieij ia ki paidbah.

Haba kren mynta ka sngi, u bah Lambor u la ong ba lada u bah Ardent u ong ba la pynbiej ia u paidbah ban mynjur ia ka jingpyntreikam ia ka ILP ha ka jylla, hato u MLA ka VPP, u bah Adelbert Nongrum um don lang seh ha Assembly haba mynjur ia ka ILP. U bah Lambor u la ong ba ka iing dorbar kala rai lang shrup ban dawa ia ka ILP ha u snem 2019, ha kaba kawei ka sur la mynjur bad la phah sha ka Ministry of Home Affairs ka sorkar India bad kam dei kaba shu phah kai, ban pynbiej ia u paidbah. “Lada phi ong ba ngi pynbiej ia u paidbah, ha kano ka rukom ki pynbiej ha kaba ngi la leit bunsien sha Delhi ban kynduh ia u Home Minister ka India, u Amit Shah. Lada ki ong ba shu pynbiej ia u paidbah, hato ki MLA jong kita ki party, kim don bynta ne, kumno kin ong ba ngi lehkai. Nga kwah ban kylli ia u MLA ka VPP, hato u MLA jong kane ka party, um don lang seh ha Assembly haba mynjur ia ka ILP”, la ong u bah Lambor. U la ong ba kumba dawa ki sengbhalang, ki MLA ruh ki dawa ia ka ILP hynrei ka jylla Meghalaya ka dei ka khyrdop ban iaid sha kiwei ki jylla bad kane ka bynta ka donkam ban pyrkhat bha, kumno ban pyniaid khnang ban ym don kano kano ka jingdkoh. Lah ban kdew ba dang shen, u President ka VPP u bah Ardent M Basaiawmoit ula kynnoh ba ka jingmynjur ka iing dorbar thawain ia ka ILP, ka dei tang ka jingpynbiej ia ki sengbhalang, bad u la ong ba ka la dei ia ka sorkar jylla ban shu weng noh ia ka jingpynbna ka President ha ka por ba ka pynmih ia ka hukum ban weng noh ia ka Khasi-Jaintia Hills na ka shatri ka Eastern Bengal Frontier Regulation Act 1873. “Dei ma ngi kiba wanrah ia ka rai ban dawa ILP, ha kaba kawei ka sur la mynjur bad la phah sha ka MHA bad kam dei kaba shu phah kai, ban pynbiej ia u paidbah hynrei haba iakren ka don ka jingduhnong bad ka jingioh nong”, la ong u bah Lambor. “Ki MLA ki dawa bad kumjuh ki sengbhalang ki dawa ia ka ILP hynrei ka jylla Meghalaya ka dei ka khyrdop ban iaid sha kiwei ki jylla bad kane ka bynta ka donkam ban pyrkhat bha, kumno ban pyniaid khnang ban ym don kano kano ka jingdkoh”, la bynrap u bah Lam.