Hato U Blei, un shahshkor mo ia ki jing duwai jong ngi?

Mr D. Pakyntein

Baroh ngi ju duwai, kumba la hikai. Hato U Blei Un shahshkor mo ia ki jing duwai jong ngi? Kane ka long ka jingkylli kaba eh bha, bad ym don mano mano ruh ba lah ban jubab na ka bynta kiwei kiwei. Shimet, ngi tip bha, ba ki jingduwai jong ngi, ki biang ne em bad ki kam kiba ngi ne ngin leh, ki long ne em kat kum ka mon U Blei? Bad shimet ruh ngi tip bha mano ban shahshkor.

U Soitan ruh u dei u badonbor bha, uba lah ban shahshkor ia ki jingduwai bymman jong ngi. Kaba kham ia tip bha ia ka bor u Soitan, ka dei kat kum ka Ktien U Blei ha ka Kitab EKSODOS 7:8-12. Ngi shem ba haba U Aaron u la bret ia u diengduh ha khmat U Pharoah, bad ha khmat ki shakri jong u, te u la kylla bsein. Ki nongleh byrtong ka ri Ijipt, ki la bret uwei uwei baroh ia la ki diengduh, te ki ruh ki la kylla bsein. La iathuhlypa ruh ka kum ka Kospel U MARKOS 13:21- Ynda kumta lada uno uno ruh un ong ha phi. Ha khmih, hangne U Khrist, lane.

Ha khmih, hangta, phi wat ngeit: 13:22 – naba ki Khrist lamler bad ki nongiathuhlypa lamler kin mih, bad kin pyni ki dak bad ki jingphylla ia kaban shukor noh, lada lah, wat ia kiba la jied. 13:23 – Hynrei to sumar phi! Ha khmih, nga la iathuhlypa ha phi ia kiei kiei baroh. KA JINGPYNPAW 20:7 – Te ynda la pyndep ia kata ka shi hajar snem, yn pyllait noh ia uta u Soitan na ka byndi jong u. 20:8 – bad un leit mih noh ban shukor ia kita ki kynja bynriew kiba ha kita ki saw dong ka pyrthei, ia u Gag bad ia u Magog, ban pyniaseng lang ia ki sha kata ka thma: ka jingkhein jong kita la long kum u shyiap ka duriaw. Ki bor u Soitan ki long tang shipor. Namar yn thang noh ia u. KA JINGPYNPAW 20:10 – Te ia uta u Soitan uba shukor ia ki la bret kein sha kata ka pung ka ding bad u kyndok, ha kaba ki don ruh uta u mrad khlaw bad uta u nongiathuhlypa balamler: bad yn pynkordit ia ki mynsngi bad mynmiet sha ki bymjukut ki bymjukut.
Ha Ka Kitab Kaba Ar KI KHRONILK 1:1-13 ngi shem ba haba la thung Syiem ia U Solomon, U sngew ba U long tang u khynnah uba rit bad um tip kumno ban bishar ia u paidbah bakhraw. Kumta U duwai, bad U Blei U la paw ha U bad u la ong ha u, To pan ngan ai aiu ia me. U Solomon um shym la pan ia ka spah, burom, lymne ia ka jingim jong kita kiba shun ia U, ne ban im slem. Hynrei U pan ia ka jingstad bad ia ka jingtip ban bishar. 1 KI SYIEM 3:10 – Kata ka jingkren te ka la pynsngewbha ia U Trai, ba U Solomon u la pan ia kum kane. Bad U Blei U la ai ia U Solomon, ym tang ia kaba U pan, hynrei U ai ruh ia kiei kiei baroh kiba U Solomon um shym la pan.

Baroh kiba ngeit, ki dei ban ngeit beit, ba baroh ki Nongsynshar ha ka Pyrthei la buh da U Blei hi. Namarkata, ngim dei ban khnium, hynrei hun beit. Duwai na ka bynta jong ki ruh, ba kin lah ban synshar kat kum ka mon jong U.