Hato, pynphlop ki MLA u sing ban long Chief Minister u Bah Ardent?

Babu Kular Khongjirem

Katba ka jingiaknieh ban thaw sorkar ha Meghalaya ka dang thnem bha,namar ka NPP+BJP ka la dawa ban thaw sorkar,ki kynhun liang pyrshah kiba kynthup ia ka Congress,TMC bad ki regional parties lem bad ki Independent ruh ki la pynkhreh ban leit dawa lem ban thaw sorkar na u Lat(Governor).

Katei ka kynhun pyrshah NPP+BJP kan sa jied(elect) ia uno uno u nongialam napdeng jongki uban un long kum u Chief Minister na kano kano ka party uban ialam ia ka sorkar synrop kat uba ki kham ia ibit bad ia pdiang lang ban ialam ia ka sorkar synrop kaba thymmai.Napdeng ki nongialam kiba lah ban long Chief Minister jong ka kynhun pyrshah NPP&BJP, i Bah Ardent Miller Basaiawmoit na ka party VPP ila long lypa iwei iba kham hakhmat eh ban ialam ia ka sorkar kum u Chief Minister ba thymmai ka sorkar synrop ha Meghalaya.Jin lada ki ar ngut ki MLA u sing kim shet kylla,u paidbah ka bri u Hynniew trep hynniew basa un jin da la kmen bad shong shit shisha da ka jingkyrmen ia ka lawei ba phyrnai na ka bynta ka jingkylla thymmai shisha ka synshar khadar ha kane ka ri jongngi. Hynrei,ka jingkhmih lynti ki paidbah ka la kylla pyrdet plak namar ar ngut ki MLA jong u sing(HSPDP) ki la shet kylla bad jah klep khlem da pyntip ne burom shuh wat ia ki nongialam ka party HSPDP.

Nalor ba ki dang jop thymmai,nalor ba ki shah shet bad shah pynbiej ha ka jingthong bad shah khring ba laiphew jait ha ki party heh spah kiba nabar ka jylla kum na Assam bad Delhi na ka bynta ka jingmyntoi jongki. Lada ka sorkar bym don ka NPP&BJP ka wan shisha hapoh ka jingialam jong i Bah Ardent,ka jingangnud ki paidbah ban ioh ia ka sorkar kaba khuid,ka bym shah shiliang bad kaba lait shisha na ka bam sap bam pong.Ki samla khlem kam khlem jam kan urlong shisha namar ka State Reservation Policy kan kylla noh sha 80% ia ki trai shnong jong ka Meghalaya,kampher la ki dei ki Khasi_Jaintia ne Garo da kaba bishar bad pynshong nongrim katkum ka jingstad bad jinglah ne jingtbit jongki ia ka kam.Lada kane ka urlong,khlem pep ki khun samla jongngi kin iohkam sorkar shisha ha man la ki tnad sorkar kum ka tnat pulit,Health,bad ha man la ki tnat sorkar ki samla jongngi kin iohkam shisha ha kane ka jylla lajong. Ym tang kata,ka Iewduh kan kylla long biang ka Iew ba long trai shisha ki Khasi-Jaintia bad ka Land Transfer Act,ka ain bym shah ban thied jaka ia ki dkhar ha ri Khasi Jaintia yn pynjanai bad pynkhlain shuh shuh ia ka Hok longtrai ki trai shnong trai muluk. Ka jingshet kylla ki MLA u sing ka la wanrah ka jingkthang bad ka jingtim ia ka lawei ka shynshar khaddar ha ka ri Khasi Jaintia jongngi.

Kumno ki paidbah ki pyrkhat halor kane?Don seng bhalang ne kynhun kum ha ki por mynshwa kiba lum ban lang ia ki paidbah ban ia pyrshah lang ia kane ka sorkar NPP+BJP kaba la pyniaid nadien(remote control) na ki bor kiba nabar ia ka shynshar ka khadar ha ri jongngi?Lada don ba ialam(who will bell the cat) ki paidbah imat,ki la long kiba kloi ban bud nadien khnang ban ioh shisha noh da ka sorkar lajong da ki briew lajong khamtam ha kum kane ka por ba dangkhluid bad dang ih bha ka por ban thaw ia ka sorkar thymmai.Lada bakla mynta ka taiew,ym lah shuh ban khyllie ne kyndit bynriew hadien kane ka taiew,,namar ka la dier ka por.Wat ia pyrkhat shuh da kumwei shisien ba lah lait ka skei na ktem.