HATO LADA PYNTREIKAM IA KA ILP BAD ARTICLE 371 HA MEGHALAYA HAP PYNDUH NOH IA KA KHYRNIT BA HYNRIEW (SIXTH SCHEDULE)?

B.N. Khongwar

Ym lah ban len ba ka jaidbynriew Khasi ka dei ka jaidbynriew kaba rit eh ha ka thup ki jaidbynriew hangne ha snieh pyrthei, kaba don ia ka jingbun briew kaba tang 15 lakhs tam katkum ka jinglum jingkhein da ka sorkar ha ka snem 2011 (2011 Census). Kane ka jingrit paid ka jaidbynriew Khasi ka dei ma ka, ka daw bah kaba la pynmih ia bun ki jingiakhih bapher bapher ban dawa ia kita ki ain ba shonghok na ka sorkar ban iada ia ka jaidbynriew na ka jingshah tyllep noh bad jing jah rngai noh na sla pyrthei da ka jingwan buhai shnong kita ki heh paid na kiwei kiwei pat ki bynta ka Ri India. Kane ka jingrit paid jong ka jaidbynriew jong ngi bad ka jingsyier na ka jingshah tyllep noh ha ki bor ba nabar ka dei ka daw bah kaba la pynlong ia ki samla ban lyng-a ban pisa haba ki pyrkhat iala ka lawei ka jaidbynriew. Naduh ka snem ba la pyniasoh ia ki Hima Khasi bad ka Ri India ter ter haduh ka snem ba ngi ioh ia la ka jong ka jylla, ngi shem ba ki mat jingiakhih ba ha khmat eh bad ba pynkhih phaloh ia kane ka Rilum Khasi jong ngi bad ia ka Meghalaya hi baroh kawei dei beit tang kata ka jingtieng ioh shah tyllep noh ha kiwei pat ki heh paid na kiwei ki jaka la ki dei ki bar ri ne bar jylla kiba lah ban knieh noh shisyndon ia ka hok Nongkynti jong hala ka Ri ynda ki la heh paid bad ba ngin sa kylla long ki mraw ha la ka Ri lajong.

Naduh ka snem 1970,1980,1990 ter ter haduh kine ki sngi la iohi ba kane ka mat ban iada ia ngi ki rit paid hangne ka la dei ka mat ba ha khmat eh ba ki Nongialam ka jylla jong ngi, khamtam ki Nongialam Sengbhalang kiba ju mih shakhmat ban kren bad ban iakhun ia kane ka mat ban pynsngew sha ka sorkar ban ai ia kita ki ain kiba lah ban iada ia ngi na ka jingshah tyllep noh ha ka umsaw ki poiei. Ka jingiakhih ban ioh iala ka jong ka jylla ruh ka dei beit halor kane ka mat. Kumjuh ka jingiakhih ban beh noh ia ki poiwir na Bangladesh (refugees) ba la wanrah da ka sorkar India hangne ka Rilum jong ngi ha ka thma Bangladesh Pakistan , ka jingiakhih ban beh noh ia ki dkhar Nepali bad ki khar Bengali kiba la roi stet bad sdang thombor ia ki trai jylla bad kiwei pat ki jingiakhih kiba la wanrah wat ia ka jingia umsnam ba shyrkhei bad iap briew ha kito ki sngi, bad kine ki juh ki mat jingiakhih pyrshah ki dang iai bteng kat haduh kine ki sngi.

Ngim lah ban len ba sa kawei pat ka jingma kaba khraw ka la mih hadien ba ka sorkar India hapoh ka jingialam ka BJP ka la wanrah sa ia kawei pat ka ain iakjakor pyrshah ia ki rit paid, kaba ailad ia ki mynder ba dei na ka kynhun niam Kristan, Jain, Hindu bad kiwei pat ki bym dei Muslim kiba na Bangladesh, Afghanistan, Pakistan ban wan long ki Nongshong shnong ba pura ka India. Kane sa shisien biang ka la pynkhih win puk ia ka Thain shatei Lam mihngi ka Ri India bad ia baroh kawei ka India na ka daw ka jingpyrshah ia kane ka ain. Ka jing pyrshah ia kane ka ain ha North East kam dei kum ha kiwei pat ki bynta ka Ri India ha kaba ka jingpyrshah ka long beit halor ka Nongrim jong ka niam namar ba ia ki Muslim ym shym la kynthup lang hapoh kane ka ain ban ai long Nongshong shnong , hynrei ha kane ka thain shatei lam mihngi ka jingpyrshah ia kane ka ain ka kham pher namar ka jingpyrshah ka long beit halor ka nongrim ba kane ka ain ka wanrah ia ka jingma kaba khraw ia ki trai Ri rit paid kiba sah ha kane ka thain naba ka shah ia kiwei pat ki heh paid ban wan buhai shnong bad sah duh sah dam hangne. Bad kam dei satia ka jingiakhih pyrshah halor ka nongrim jong ka niam ne ka jingbym kynthup ia kiwei pat ki jait niam hapoh kane ka ain. Baroh ngi la ioh sngew bad iohi ruh ia kaei kaba la jia ha ka jylla Tripura,ha kaba ki Tripuri ki la kylla long ki mraw hala ka Ri lajong. Kumjuh ka jingma ia ka Meghalaya bad ia ka Ri-Khasi lada ngi ki Trai Ri trai muluk ngim kyndit thiah ban iakhun bad ban dawa ia ki ain kiba khlain ki ban iada iaka jaidbynriew ka jingma ka la ap lupa ia ngi na ka jingshah tyllep noh ha kiwei pat ki briew kiba na bar ri.

Ka jinglong ain jong kane ka Citizenship Amendment Act 2019 ka la pynkyndit thiah ia bun ki paid Nongshong shnong ka Meghalaya bad ha kane ka kynti namar ka jingshep tieng ia ka jingma ioh ba ka jaidbynriew ka kylla rit paid ha la ka Ri lajong. Ka jingwan kane ka ain ka la pynlong ym shuh tang ia ki Sengbhalang ban mih shakhmat ban dawa Ia ka Inner Line Permit, hynrei ha kane ka kynti ka jingdawa ILP ka dei beit jong ki paidbah, ngi la iohi ia kane ba man ki Rally ki paidbah ki dap mam ban ia shim bynta ha kine ki jingialang paidbah ban dawa ILP. Ym lah ban len ba ka ïing Dorbar Thaw ain ka sorkar jylla ha kane ka kynti ka la pass syndon da ka resolution ban buh ha khmat ka sorkar India ba ka dei ban pyntreikam noh shisyndon ha Meghalaya ia ka ILP kumba leh ia ka Manipur, Mizoram, Arunachal Pradesh, Nagaland. Hynrei kane ka la pynkulmar jingmut shuh shuh ia ki paidbah naba kine ki riew sain Pyrthei ki ai ia ki jingkren bapher bapher kaba la pynlyngngoh ia ki paidbah bad kaba wanrah ia ki jingkulmar jingmut.

Kane hi ka pyni shai ba ki Nongmih khmat jong ngi haduh mynta ki dei tang ki riew sain pyrthei thaw kamai politics bad ngim iohi shisha ba ki long ki Nongialam kiba sngewkhia shisha ia ki paidbah bad ia ka lawei jong ka Ri bad ka jaidbynriew. Dang ha ka 30 tarik u Nohprah ngi la iohi lyngba ki lad pathai khubor ba u MP ka Shillong Constituency u Vincent H. Pala u la ong ba ka jylla jong ngi lada ngi ioh ia ka ILP ngi hap ban duh noh pat ia ka Sixth Schedule bad ngi hap ban jied kawei napdeng kine. Lane kane ka jingong jong u kamut ba lada pyntreikam ia ka Inner Line Permit hap ban pynduh noh ia ka Sixth Schedule lane lada ngin pynneh beit ia ka sixth schedule ngin nym lah ban pyntreikam ia ka ILP. Kaba mut ba ngi hap ban jied kawei napdeng kine bad ym lah ban ioh baroh ar.

Kane ka jingkren jong une u MP kala pynkulmar jingmut haduh katta katta ia ki paidbah khamtam ia kito kiba duna ka jingnang jingtip. Hynrei lada ngi ia phai sha ka jylla Mizoram kane ka jylla ka la ioh ia ka ILP bad ka don ruh ia ki District Council, kaba mut ba watla ka jylla Mizoram ka hap hapoh ka Sixth Schedule hynrei lah pat ban pyntreikam ia ka ILP ruh. Kaba mut ba ka Sixth Schedule kam dei satia u mawjynthut ban pyntreikam ia ka ILP. Kumta ka jingkren u Bah Vincent Pala kum u MP jong ngi na Shillong ka pyn-i shai ba u khlem don mon satia bad um mynjur ban pyntreikam ia ka ILP hapoh kane ka jylla jong ngi. Bad kum kine ki Nongmih khmat kiba ngi khmih lynti ba kin kren ia ka sur jong u paidbah hapoh ïing Dorbar thaw ain, hynrei dei ma ki pynban kiba pyntieng bad pynkulmar jingmut ia ki paidbah da ki jingkren laplah ban ioh nong politics ym ba ki sngew khia shisha ia u paidbah ka jylla ba ki mih khmat . Kaba mut ba u Bah Vincent Pala u don ka jingsngew pyrshah ia ka Resolution ba la passed da ka ïing Dorbar thaw ain ka jylla ha ka 19 tarik u Nohprah u 2019 kaba dawa na ka sorkar India ban pyntreikam ia ka ILP ha Meghalaya .

Shuh shuh ka jingong jong u Bah H.S. Shylla na ka por sha ka por ba lada ngi ioh ia ka Article 371 hapoh ka jylla jong ngi ki District Council kin duh noh. Ngi iohi ba ia kane ka mat jong ka Article 371 kaba u Bah Ardent Miller Bassaiawmoit MLA barim ka Nongkrem u la ju kren na ka por sha ka por ba ka dei kawei pat ka atiar ba ngin iada ialade kum ki rit paid bad kaba da lade hi u la rah ban iatai ia kane ka mat hapoh ïing Dorbar Thaw ain ka jylla ha ka por ba u dang long u MLA. Kane ka jingkren u Bah Shylla ha kaba ia dei bad ka Article 371 ruh ka la pynkulmar jingmut haduh katta katta ia u paidbah bad ka pynsah um dum ia u ba bun ba lang ba hato ka jingong u Bah Ardent ne u Bah Shylla ka dei kaba shisha?

Khyndiat lada ngin peit Hapoh ka Constitution ka India ngi iohi ba ka Nagaland la bsut ia ka Special provision lyngba ka Article 371A bad ka Mizoram pat la bsut ia ka Article 371G bad hapoh kane ka Article 371 jong kine ki jylla la ong ba ki ain jong ka Parliament ka India kin nym lah ban treikam hapoh kine ki jylla lada kita ki ain ba pass ka Parliament ki long pyrshah ia ka niam ka rukom ne ka rukom im, ia ki riti ki dustur, ne ia ka hok halor ka khyndew ka shyiap bad kiwei kiwei pat lada ka ïing Dorbar thaw ain kitei ki jylla ki khlem pass ia ka resolution ban pdiang ia kaba kum kata ka ain ka sorkar pdeng. Kumta ngim lah ban leh ba ka Article 371 ka dei shisha sa kawei pat ka atiar ba ngi lah ban iada ialade kum ki rit paid hangne hapoh ka jylla jong ngi.

Kumta lada ngi phai sha ka jingong u Bah Pala ba ka Meghalaya namar ba ka don ia ka Sixth Schedule ym lah satia ban pyntreikam ia ka ILP bad lada pyntreikam ia ka ILP ngi hap ban duh noh ia ka Sixth Schedule bad lada ngi bat triang ia ka Sixth Schedule ym lah ban pyntreikam ia ka ILP. Kaba mut ba ngim lah ban ioh bad ILP bad Sixth Schedule ha ka juh ka por, kawei napdeng kine ka hap ban duh noh. Kumjuh ruh ka jingong U Bah Shylla ba lada ngi pdiang ia ka Article 371 ki District Council kin duh noh ruh kam dei kaba shisha namar lada ngi peit iaka jylla Mizoram ka hap hapoh ka Sixth Schedule ka don ia ki District Council, ka ioh ruh ia ka ILP bad kumjuh ia ka Special provision hapoh ka Article 371G. Kumta por ka la dei ia ki Nongmih khmat, ki Nongialam paidbah bad ia ki riew shemphang jong ngi ban kren ia kaba shisha da ka jingsngew khia iala ka jong ka ri, ym ban shu kren pynlait jynhaw ban kynthoh ia ka jingkren bad ka nongrim kiwei pat, lada kata ka long kaba shisha bad kaba long ka atiar kaba lah ban iada ia ka Ri bad ka jaidbynriew namar kane kan shu pynkulmar jingmut kai ia u paidbah uba duna ka jingnang jingtip bad u ba ieid shisha iala ka Ri bad ka Jaitbynriew. Kumjuh ruh ka la dei ka por ia ngi ki paidbah ban nym shu ngeit ia kaei kaei kaba ngi iohi bad ioh sngew na ki kot khubor khlem da ïit ia ka jingshisha halor kita khnang ba ngin nym long tang ki lang matlah ne ki si samkhmut kiba ki politicians ki lah ban ialam ia ngi kat shaba ki mon.