Robertjune Kharjahrin, Chairman CoMSO
Naduh ba ka la ioh iala ka jylla lajong, lyngba ki snem bad phew snem, ka jylla Meghalaya ka la thaw ia ki ain iada Ri kum shi bynta ban teh lakam ia ka jingrung kyrthep ki poiwir ba nabar ha ka jylla jongngi bad ban pynskhem ia ka jinglongtrai longkynrad ki trai ri trai muluk halor ka jaka ka Ri lajong.
Ha u snem 1973, ka dorbar thawain ka jylla Meghalaya ka la wanrah bad mynjur de ia ka Meghalaya Residential Permit Bill, 1973 bad katkum kane ka ain, kino kino ki barri bad barjylla kiba thmu ban sah ha ka jylla Meghalaya palat ia ka 4 bnai ki hap ban pan jingbit ha ka sorkar bad khlem ka jingbit ka sorkar, lada ki sah khlem jingbit palat ia kata ka por, kin shah beh bad shah pynshitom da kaba shahset phatok lane shah dain kuna . Kumba ngi tip, u President jong ka Ri India ha Kato ka por um shym la treh ban mynjur ia kane ka Bill.
Hadien ka jingjur jong ki jingiakhih , ka Dorbar thaw ain ka jylla ka la mynjur ia ka Meghalaya Employment Bill 1980 bad katkum kane ka ain, ki barri bad barjylla kim lah ban wan trei ne wan bylla ha ka jylla jongngi khlem ka jingbit jong ka sorkar bad ka sorkar kan nym ai jingbit ia ki barri barjylla lada don ki trai ri trai jylla kiba lah ban trei ia kata ka kam . Ia kane ka bill ruh, ngi sakhi biang ba u President ka Ri India um shym la treh ban ai ia ka jingmynjur. Namarkata, kumba long ha u snem 1973, sa shisien la shah khein dewthala ia ka sur jong ki nongialamjongngi.
Haba ngi jam shuhshuh sha ki sla ka Histori, ngin shem ba ha u snem 2004, ka Cabinet Committee on Public Grievances ia kaba la khlieh da u Bah Paul Lyngdoh ( uba la long u Minister hakato ka por) ka la ai jingmut ban pyntreikam ia ka Three Tier Identity Card System . Ka sorkar hapoh ka jing long Myntri Rangbah jong u Dr D.D.Lapang ka la mynjur ia kane ka jingai jingmut bad ka la thoh sha ka sorkar India ban iarap halor kane ka kam hynrei ngi lap ba ka sorkar India kam shym la iarap ha kane ka bynta bad kumta kane ka kam ka la shu kut noh khlem da lah ban pyntreikam iaka.
Ha kaba iadei bad ka Inner Line permit System ( ILP), ngin shem ba nyngkong eh, dei u Bah M.N.Majaw uba la wanrah ia ka Bill ban dawa pyntreikam ia ka ha ka jylla jongngi. Une u rangbah la wanrah ia ka Meghalaya ( Extension and Application of Bengal Eastern Frontier Regulation ) Bill 1979 hynrei ka Dorbar thawain ka la kyntait ia kane ka Resolution.
Ha u snem 1987, U Bah S.D Khongwir ruh u la wanrah ia kane ka juh ka Bill bad la phah iaka sha ka Select Committee bad sngewsih ban tip ba ha kane ka sien ruh, ka Bill ka la shu jah noh khlem lah ban pass bad pynlong ain ia ka. Nangta, ha u snem 2013, u Bah Ardent Basaiawmoit u la wanrah ia ka Resolution ban pyntreikam ia ka ILP ha ka jylla jongngi hynrei kane ka Resolution ka la shah pynjah sur noh ha ki number ka sorkar Congress ha kato ka por.
Lada ngin poi pat ha u snem 2019, ngin kynmaw ba ka Dorbar Thaw ain ka jylla Meghalaya ka la wanrah iaka Resolution ban dawa na ka sorkar India ban pyntreikam i aka ILP ha ka jylla jongngi bad kumba ngi tip, baroh 60 ngut ki MLA ka jylla ki la ia kyrshan ia kane ka Resolution bad sngew bynniaw ban tip ba ka sorkar India ka buhteng sah ia kane ka kam namar haduh mynta kam pat shym la khot iakren bad ka sorkar jylla jongngi ban iakren bad shim rai de halor ka jingdawa ILP ki paid Meghalaya jongngi. Ha ki sngi ba lah leit dang shen, la mih ki khubor hamsaia ba ka sorkar India kan ym mynjur ban pyntreikam ia ka ia ILP ha ka jylla Meghalaya bad kane ka pynkulmar bad pyndukhi ia baroh ki paidbah bad ki nongialam kiba angnud ban ioh ILP. Ka por ka her stet bha bad wat hadien shibnai tam naduh ba la pass iaka Resolution , u Myntri ki kam pohiing ka Ri India, u Amit Shah um pat aipor ban iakynduh ia ki Minister ka sorkar Meghalaya. Haduh mynta, ka Home Ministry kam pat aiktien halor ka Resolution ba la pass da ka Dorbar Thaw ain ka jylla Meghalaya bad ka jingkylli kaba baroh ngi ia kylli mynta ka long: Hato ka Sorkar India ka kwah ba ki jaidbynriew Trai Ri ( Hynniewtrep bad Achik) kin long noh ki ritpaid ha ka ri ka jylla lajong kumba lah jia ia ki trai jylla ka Tripura, Sikkim bad kumjuh ki ba bun ki bynta ka Assam.
Ka jingkyntait jong ka sorkar India ia ki bill bad ki Resolution kumba la kdew haneng, ia kiba la mynjur da ka sorkar jylla ha ki snem kiba la dep, ka pyn mutsniew ia kiba bun bad lada jia ba ka sorkar India ka dang kyntait ban pyntreikam ia ka ILP ha ka jylla Meghalaya sa ha kane ka kynti ba mynta, kan pynskhem ia ka jingkhein sting, jingbymsuidniew bad jingbymburom jong ka sorkar India ia ka sur ki trai ri trai muluk bad ka jingkitkhlieh kan long ka jong ka sorkar , U dak jingkylli u dang sah haduh mynta mynne ba Hato ki trai Ri ka Jylla Meghalaya kin long mraw hala muluk naba kuman ka sorkar Kmie?
Ka por ka la dier ia ka jaitbynriew Hynniewtrep jongngi ban shu ap shi ap ia ka sorkar pdeng ban iakren ia ka ILP. Ngi la iohi ia ka jinglong ki nongmihkhmat jongngi kiba pyndem tdong…Kumta ngi kyrpad iaphi ki nongialam ki sengbhalang ba phin iawer ia baroh ki briew Hynniewtrep Khasi jongngi ban mih paidbah ban pynlong ia ki rally ban dawa ia ka ILP.