Hato ki nongmihkhmat MLA ki kloi ban pynsangeh shwa ia ki kam pynroi naka MLA Skhim?

Bah Anthony N. Nongbri

Malki, Shillong.

Ka jinglong jingman ha ka Ri India baroh kawei khamtam ha kane ka jylla na ka jingpang Corona virus ne COVID-19, ka la long shisha kawei na ka khlam kaba kum ka jaitbynriew bad ka jylla hi baroh kawei ki mad ha ka sien ba nyngkong eh, ha kaba ka jingsyier, jingtieng, ka jingiakiar bad jingshah khang sa ki jaka mane Blei ka la pynsuhjer ia u babun.

Ha ba phai dien naduh ba u Myntri Rangbah Duh ka Ri India u Narendra Modi u la pynbna ban don ka jingkhang ia ki nongshong shnong ka ri ban shong khop ha la ki iing ki sem na ka bynta 21 sngi kaba la sdang naduh ka 25tarik u March 2020 haduh 14tarik u April 2020 bad ka jingbteng biang ia kane ka jingkhang haduh ka 3tarik u May 2020, ngi lah ban sakhi ia ki jingeh jingjynjar ha ki rukom bapher bapher ba man uwei pa uwei u nongshong shnong ka ri u hap ban mad bad iakynduh.

Ha kane ka jylla, ngi la iohi katno baka sorkar ka mad ia ki jingeh ban iakhun pyrshah ia ka COVID-19 ha kaba u Myntri Rangbah, u Symbud Myntri Rangbah bad u Myntri ka koit ka khiah kim shong kli kti ban teh la-kam bad wanrah ia ki lad iakhun ia kane ka khlam da kaba kyrpad bad iai kyrpad ia ki paid nongshong shnong ka jylla ban adkar bad burom ia ki jingbtah ka sorkar ryngkat ka jingkyrpad ym tang ha ka jingiatreilang bad ki shnong ki thaw hynrei wat ban kyrpad ruh ia ki riew kylluid mynsiem ban noh synnniang sha ka Chief Minister Relief Fund wat haduh ba la poi u pud ba hap kyntiew dor i aka petrol ban lah ban iakynduh ia ki jingeh babun khamtam haba la don ka jinghiar jrain jong ka ioh ka kot ha kiba bun ki liang.

Ha ba peit ia ki jingeh baka sorkar bad ki nongshong shnong ki hap ban mad, la iohi kumno ka sorkar ka la shim iaka sienjam ba nyngkong eh ban iarap ia ki paidbah lyngba ki nongmihkhmat da kaba mang T.25 Lak marwei ia baroh ki MLA, naka song MLA Skhim jong u ne ka MLA kaba kot T.2.50 Klur shisnem bad kane ka jingleh jong ka sorkar ka la long kaba dei eh ban iaroh.

Ha ba khmih ia kine ki jingpyrshang ka sorkar ban iarap ia ki paidbah lyngba ki MLA, ym lah len ka la long ka jingkyrkhu bakhraw ha ki konstituwensi bapher bapher kiba ioh mad iaka jingleh isynei. Hynrei sngewsih ban ioh sngew ruh hangne hangtai pat don ki paidbah kim shym ioh lang ka lad ban mad ia kata ka jingiarap na ka MLA skhim, namar la kynnoh ba ka la long tang ka jingpyndep rukom, ne kata ka iarap tang ia kito ki ba ju ia kyrshan nalor kata ka jingiarap tang para ba iadon jingiadei nalor bun kiwei de ki kynjnit kynjnat ban thaw ain hi mano ba dei ban ioh bad kumno ki dei ban ioh.

Ha ba phai lei sha ki khubor, la ka long ha ki Media Channel ne Social Media, la ijli hi khait ia ka jingkwah burom ki katto katne ki MLA/MDC ban pathai khubor ia ka jingleit iarap ka jong ki bad ka shon pyni dur ia kito kiba donkam ka jingiarap la kumba ki ai jingiarap na ka pla pisa lajong. Ym lah len ka long kaba dei eh ba kin shim kabu ban leh politik ha kaba kum kane ka por, hynrei ka jingkylli ka ba ngi dei ban tied ha ki ka long Shano ka jingiatip lem jong phi ka don.

Ki nongmihkhmat paidbah naduh ki nongthaw ain bad kiwei kiwei ki la dei ban mih shakhmat ban ai jingmut bad dawa naka sorkar lyngba u Myntri Rangbah u Conrad Sangma ban leh eiei ia ki paidbah ka jylla kiba la ngat ha ki jingeh ki babun, ha ki rukom bapher bapher ban iarap ban tei biang iaka jingkyllon ha ka ioh ka kot jong kiba bun balang, ym tang ki nongbylla sngi, hynrei kiwei ruh ki nong sengkam lajong kiba trei ha ki kam bapher bapher kiba lah duh la ki kam ki jam bad kito kiba la mad jingeh na ka jingshah khang sbak ki kam ki jam jong ki.

Hato ki paidbah kiba la jied iala ki MLA, ki kloi mo ban ai jingmut, ban kyrpad ia la ki nongmihkhmat ban pynsangeh noh shipor ia ki kam pynroi na ka MLA Skhim naka bynta shi samoi. Bad lada ki kloi ban shim ia kane ka rai rangbah ngi kyrmen ba ka sorkar kan lah ban tei biang ia ki jingeh ba ka hap ban mad hadien kane ka khlam.

Kum ban pynkynmaw ka sorkar ka la mang tang T.25 lak na ka T.2.50 klur jong man u/ka MLA bad lada lah ban shim ia kane ka rai ba jwat tasam, ngi ngeit skhem ba ka sorkar kan ioh lum palat spah klur tang lyngba ka MLA Skhim ban tei biang ia ka jylla hadien kane ka jingpang bad ban nym leh bakla shuh ban ai laitlluid sha ki MLA, hynrei ban pyntyllun hi da ki tnad sorkar na ka bynta ka jingbym shah shiliang khmat jong baroh u nongshong shnong ka jylla.