HATO KI C&RD BLOCK KI DEI TANG JONG KI POLITICAL PARTIES?

La thoh da u Ex.Rev.K.Langrin, Seiñduli,

Mawshynrut C&RD Block, WKHD.

Ki la don bun ngut ki riewpaidbah kiba ju ud ju nam bad pynpaw ia ka jingsngewsih halor ka jingleh jong ki nongtrei ha ki C&RD Block, kiba leh politik hateng hateng. Dei halor kata ka daw ba sa mih ka jingkylli – Hato ki C&RD Block ki dei tang jong ki Political Parties?

Katkum ka jingiathuh jong ki katto katne ki riewpaidbah, haba ki leit donkam ha ki C&RD Block, hana ki nongtrei jong ki Block ki ju kylli shuwa – Phi dei na ka party aïu? Lada ki riew paidbah ki iathuh ba ki dei na ka party ka bym don ha ka sorkar ne lada ki khlem kyrshan ia u nongmihkhmat uba jop, hana ba kita ki nongtrei Block kim ju ia kren bha. Hynrei lada ki riewpaidbah ki iathuh ba ki dei na ka party jong u Local MLA ne MDC, ki nongtrei Block ki burom bha bad ki kloi ban leh ia kano kano ka kam kat kaba ki ong.

Kaba kum kata ka jingleh jong ki nongtrei jong ki C&RD Block ka long kaba sniew bad kaba pynsngewsih ia ki riewpaidbah jong kata ka Block. Ha ka jingshisha, lada ioh synshar mano mano ne lada jop MLA ne MDC mano mano ruh kam pher. Ki nongtrei jong ki Block kim dei ban kylli party, kim dei ban leh shiliang khmat hynrei ki dei ban ñiew kajuh. Namar ngi la iohi bad ki nongtrei Block ruh ki la iohi ba ym ju don ka Party kaba jop lynter naduh basdang haduh bakut ne kaba bat sah ia u lakam synshar shi lynter jingim.

Te nga don khyndiat ki jingai jingmut ia ki nongtrei Block, kynthup ruh ia ki nongtrei sengbhalang kiba ju iarap ia ki shnong ki thaw ha ki por jong ki jingeh – Ba kaba bha tam ka long ban shu shaniah bad pdiang beit ia ki jingleh jong ki shnong, ym ia ka jingjied jong ki nongtrei jong kano kano ka Political Party kiba jied tang ia ki briew la jong. Bad ka long kaba sniew ban burom tang ia ki supporters jong u Local MLA ne MDC.

Kum ki khristan, kam long kaba dei ban leh shiliang khmat. Namar ka pynsngewsih ym tang ia ki briew, hynrei ka pynsngewsih ruh ia U Blei. Bad kita ki nongmihkhmat ruh kim dei ban knieh ia ka bynta jong U Blei. Namar U Blei Um ju ñiew shiliang khmat iano iano ruh. Peit ba u pynhap slap wat ia ki jaka ba shong ki bym long khristan ne bym long Muslim. U Blei jong ngi u long U Blei jong baroh ki jait niam ha ka pyrthei. Te to shim ia ka nuksa jingleh U Blei ia ki briew.