Samla, Scholar Lawriniang,
Nongthliew Village.
Ka surok ka dei U Budlum ha ka khaii pateng ha kano kano ka Ri bad ka jait bynriew, khlem ka surok ka hiar ka ioh ka kot.
Katkum ka khubor ba la saphriang ha ki social media ka la paw ba don katto katne ki ba pyrshah ia ka jingpom ia ki dieng bilat ha surok 7 mer na ka bynta ka ban shna ia ka surok 4 Lane na ka bynta ka jingmyntoi u paidbah khnang ban wanrah ia ka leit ka wan kaba suk ha ka juk mynta. Ngam tip la kiba pyrshah ia kane ki la pyrkhat jylliew ne em ha ba ia dei bad ka rukom im rukom man ki para briew na ki shnong bapher bapher kiba dei ban iaid na kane ka surok.
Ka jingpyrshah ban pom ia ki dieng na ka bynta ban shna surok ka long kaei re kaei kaba ngim lah ban sngewthuh ia ka jingpyrkhat jong kita kiba pyrshah. Baroh shikatta da ki phew hajar tylli ki dieng ba la pom na ka bynta ban shna surok ha kylleng ki jaka jong ka jylla baroh kawei, ym ju don koit u ba pyrshah ne ba ong nga jaw ummat ban iohi ba ki pynduh ia ki dieng, kaba phylla pat ka long balei ba ki pyrshah tang ia ki dieng hapoh 7 mer. Hato tang ki Dieng Bilat kiba lah ban pynitynnad ia ka mariang, hato ym don kiwei kiwei ruh ki jait dieng kiba lah ban pynitynnad. Haba baroh shikatta ym ju don jingpyrshah eiei halor ka jingpom ia ki dieng na ka bynta ban shna surok balei ba pyrshah khyllah tang mynta ia kine Dieng bilat ha 7 mer. Hato kine ki dieng kim khie im shuh lada thuh biang hadien ba la dep ia ka surok ruh?
Ka jingpyrshah lehse ka dei ka jingpyrkhat ba lyngkot kaba kim da iit bniah bha ha shwa ban pyrshah. Kino kino kiba pyrshah ia ka jingpom dieng ban shna ia ka surok 4 Lane na 7 mer ka long thik kumba pyrshah ia ki 1500 tylli ki shnong kiba dei iaid lynti na kane ka surok 7 Mer. Ki bym iaid lynti na kane man ka sngi lehse kim sngewthuh than ia ka jingeh ba ia kynduh (Tang u ba dung shiah u sngewthuh bha ia ka jingpang) ha shwa ban pyrshah hato ki la pyrkhat eiei shaphang ka jingmyntoi ki 1500 tylli ki shnong ki ba dei iaid na ka ka surok, lane ki shu pyrkhat bynnud tang ia ki dieng bilat ba ieng harud surok.
Ngi te kiba iaid na kane ka surok ka la pynsyrtok shisha shisha ia ka leit ka wan bad ka long ruh ka jingduhnoh ba khraw bha, namar ki paidbah na West Khasi Hills, South West Khasi Hills bad ki Thain Sohra, Pynursla bad kiwei kiwei kiba bun ki dei ki nongrep kiba rep 30 phew jait ki jait jingrep bad kiba ju pynpoi ia ki mar rep haba la dep lum dep lang sha shillong, hynrei kaba bunsien pat ynda poi ha 7 mer la sdang ka block, bad ap ban da lait block ka bam por 3, 4 kynta haduh ha iew, bad ka por ban die ia ki mar rep jong ngi ka dor ka la hiar namar ba la palat ka por ngi la shah khniot dor laki laka, bad lehse ki bym rep kim sngewthuh than kumno ban die mar rep ne die jhur die jhep, namar ia ki jhur ngi hap ban pynpoi ha ka iew step khnang ban biang ka dor ka mur, hynrei tang na ka block pat lah shu shah khniot dor ei man ka sngi.
Ym tang kane ka jingeh ba ngi ia kynduh bun sa kiwei kiwei kiba ghim lah ban niew ban jer lut la ka long ha ka pang ka shitom ka mynsaw ka jia ryngkhat ba dei ban poi mar mar sha ki jaka sumar ba kham biang poi tang ha 7 mer shakhmat lah shah khang kut ha ka block, phi lah ban ong balei ym kit da ka ambulance ba don siren, hynrei ki to tip ki shnong kiba dei iaid lynti na kane ka surik ba bun ki dei ki nongkyndong ngin ap jin kat ban da poi ka ambulance sha jaka ba don kiba pang, kiba pang pat tip kin jia aiu? don bun bah ba ngi ia kynduh jingeh haba khlem ka surok ba biang ba tikna. Ngi dei ban sngewthuh ba ka jingim khlem ka surok ka long kaba syrtok shisha bad ka hiar ruh ka khaii pateng ka ioh ka kot ki nongshong shnong. Kumta kiba pyrshah ki dei ban da pyrkhat jylliew bha halor kane, namar kane ka dei ka kam iao kam im jong ki 8 lak ngut ki briew.
Ko bah ngim shim khang ia kata ka development, hynrei phi la ju ioh sngew ne tip shaphang kita ki Architectural Engineering.ha Kane ka Juk ka ba mynta.