Shillong, 14’lyngkot:
Ka Meghalaya High Court ka la pynmih ia ka rai ha ka 13 tarik u kyllalyngkot halor ki kamkiba ia dei bad ki Rangbah shnong. Katei ka rai jong ka High Court ka long ba u Rangbah shnong u dei ban don kyrdan pule, u dei ban ioh tulop bad u dei ruh ban hap hapoh ki kyndon jong ka aiñ wad jingtip lane ka Right To Information. Ha katei ka rai ka High Court ka kham kdew kti ia ka sorkar Jylla, ba kan thaw da ka ain, kaba ia dei bad ka bor jong ki Rangbah Shnong bad kaba pyn pyrkhat, ba kam shym kren eiei ia ki District Council, ba kin thaw ia ka ain kaba iadei bad ki Rangbah Shnong, wat la ka dei ka bynta jong ki District Council, ba kin synshar ia ki nongpyniaid shnong, katba kum ki kyn don jong ka 6th Schedule.
Katei ka hukum jong ka High Court, ka kren shai, ba katba ka sorkar Jylla, kam pat thaw ia ka ain thymmai, kaba iahap bad ka bor ki Rangbah Shnong, kumta ka rai jong ka kashari, kaba la dep rai kham mynshwa (kaba mut ba kam pat ithuh ia ka bor ki Rangbah Shnong) kan dang iai bteng.
Hangne ka mih ka jing iakren jong ki riew pyrkhat bad kata, ka long “La ka kashari, ka ithuh ne em ia ka VAB lane ka ain jong ka Jaintia District Council, kaba la soi da U Lat ka Jylla?”.
U Rupang, u iakren bad U Chief Executive Member jong ka JHADC, U Ma Thombor Shiwat, ha kaba utei u rangbah ruh, ula pynpaw ia kajuh ka jingsngew lyngngoh, halor katei ka hukum jong ka High Court. U Ma Thombor, u ong “Ym pat nud ban ong eiei” halor ka rai jong ka High Court bad kumjuh bad ka VAB jong ka JHADC, kaba la dep soi da U Lat ka Jylla bad U Ma Shiwat, u ong shuh shuh, ba ka VAB hi jong ka JHADC, ka dei kaba ki la ia thaw lang ha ryngkat bad ka sorkar Jylla bad kaba long ruh, kat kum ki kyndon jong ka 6th Schedule jong ka riti synshar Ri.
la ong ruh ba kumba ka long mynta ka paw ba kam don ka jingiaid beit iaid ryntih ha ka jingpyniaid kaba ia dei bad ka riti ka dustur ne ka rukom treikam kaba la ai bor da ki District Council.
Bun ki jingiakren ki la mih hadien ba ka High Court ka la pynmih ia katei ka rai jong ka kaba la bthah ruh ia ka sorkar jylla ba ka dei ban thaw –aiñ ban pynbeit shi syndon ia katei ka rukom treikam ki Rangbah Shnong. Ki jingiakren kiba la mih mynta ka long hato hadien ka jingpynmih rai ka High Court ka Village Administration Bill (VAB) jong ka JHADC kan dang lah ban treikam? Ym pat ia kren ia ka VAB jong ka KHADC kaba dang sahkut pongding ha shiteng lynti.
Lah ban kdew ba shuwa ka Krismas u Lat ka jylla u la shon muhor sbak ia ka VAB jong ka JHADC kum ka dak ka jingai sngewbha Krismas ia ka, kaba la khmih lynti ba da ka jingpynlong aiñ u Lat ia katei ka VAb kan pynkupbor biang sa shisien ia ki Rangbah Shnong kiba la shah sloit iktiar ha ka 10 tarik u nohprah , 2014. Hato katei ka VAB ka JHADC kan dang lah ban pynkupbor biang ia ki Rangbah shnong Jaintia hadien ka rai ba ka High Court ka dang shu pynmih ha ka 13 tarik u Kyllalyngkot?.
Phi don ban ong eiei?