Shillong:Ka myntri ka tnad ka rep ka riang ka jylla ka Kong Ampareen Lyngdoh ka la pyntip ba ka tnad ka dang iasyllok bad ki saiantis ka ICAR bad kiwei ki tnad ban ialeh pyrshah ia ka jingpang kwai khamtam ha thain Dadenggre, West Garo Hills.
Haba jubab halor ka jingkylli kaba la wanrah u MLA ka Dadenggre u Rupa Marak hapoh ka iing dorbar mynta ka sngi, ka kong Ampareen ka la iathuh ba ki don 8 tylli ki district kiba shah ktah na kane ka jingpang kwai.
Ki don 209 ngut ki nongrep ki shah ktah ha ka Dadenggre Block bad 406 ngut ki nongrep ha Rongram Block.
Ka myntri ka iathuh ba ka daw ka jingpang ka dei na u kynja khniang uba bam ia ki bynta ba dang lung u kwai. Ban ialeh pyrshah ia kane, ka sorkar ka la ai ka jinghikai ia ki nongrep da kaba shim ia ki lad ki lynti. Ka myntri ka la ai jingiarap T.6.6 klur sha ki 3005 ngut ki nongrep kwai kiba shah ktah na ka jingsniew u kwai ba kin ioh ban rep da kiwei ki jingthung kum ka jingthung kait bad kiwei ba kin lait na ka jingkyrduh.
Na ka liang u bah Lahkmen Rymbui u MLA ka Amlarem haba bynrap halor kane, u la buh jingkylli hato ka don lad ba ka sorkar kan pyndonkam da u kot kudi nar na drone ban kynshait dawai na kliar u dieng kwai kumba la hikai ki stad ban iada na ka jingpang u kwai.
Halor kane ka kong Ampareen ka la ong ba ka sorkar kan eksamin ia kane bad kan shim ia ki lad ki lynti ban iarap ia ki nongrep.
Phi don ban ong eiei?