Shillong:Ki dak ki shin ki kdew, kumba ka National Peoples Party (NPP), kan lah ban ia khlad paralok noh bad ka seng BJP, ha ki khyndiat sngi ban sa wan bad ka daw ka long hadien ba ka sorkar BJP, ka la leit rah ia ka ain ban ai lad ia ki poiwir ba kin buhai shnong sha ka thain shatei lam mihngi.
U Conrad Sangma, myntri rangbah ka Jylla bad uba dei ruh U President ka NPP, ula ia kynduh ia ki nongialam jong ka seng NPP myn hynnin ka sngi ha Secreteriat ban iakren halor katei ka jing mynjur jong ka Lok Sabbha ia katei ka ain.
Haba iakren bad ki nongthoh khubor, U Conrad ula ong “Ngin sa iashong ban iakren ban iapyrkhat ia kane ka kam, la ngin mih noh ne em na ka NDA bad baroh ki nongialam ka party jong kane ka dong mihngi ka India”. U Conrad, ula ong ba ka seng NPP, kan sa shong noh shen ban shim ia ka rai bad katei ka long hadien ba ka sorkar pdeng ka la pdiang ia ka Citizenship Amendment Bill 2016 ne ka ain pdiang nongshong shnong ia ki briew na Bangladesh, Afghanistan, Pakistan kiba dei ki Hindu, Sikh, Parsis, Jain bad Khristan ban long nongshong shnong ha India.
Ha kawei pat ka liang, U Bah Prestone Tynsong, uba dei u myntri rangbah ba ar ka Jylla, ula pynsngew ba ka jingleit rah ia katei ka bill ha ka dorbar Lok Sabbha, ka dei ka jingthombor ia ka synshar paidbah jong ka India. U bah Tynsong, ula pynsngew ba ka seng NPP, kan sa ia kynduh shen ban ia kren halor kane ka phang bad ula ong ruh ba ka sorkar India, kam shym la shim jingmut satia, na ki nongialam jong ka thain shatei lam mihngi, ha shwa ban rai ia katei ka kam bad ula ong shuh shuh ba ha katei ka ain, ka la dei ban pynrung ia ka kyndon, ba kan nym trei kam satia sha ka dong shatei lam mihngi.
Ha ka jing iit jingtip, la lap ba ka jingdon briew jong ka Bangladesh ha u snem 2019 ka long 161,589,759. Na ka jingkhein la lap ba ha u snem 2004, ki Muslim kiba don ha Bangladesh, ki don 89.5 percent lane 137,787,259, ki Hindu ki don 9.6 percent lane 14,993,941.