Hato ka Jaitbynriew jong ngi kan ngat ha ka jingtim?

Rev. B.P.Pohsngap

Ka la dei eh ka por ba kum ka Jaitbynriew ngin hap ban pyrkhat bad kylli, haba ki jingjia na ka por sha ka por ki wan ki paw tang ki jingjia ba pynsngewsih kthang suda.

Ym pat kut ban pynbeit ia ka kam ha Them metor, la mih sa kaei kaei, katba nang wan kawei, kan bud sa kiwei kiwei de. Ki jingjia barabor ki ju wan jia, teng teng na kaba ma ngi kum ka jaitbynriew ngi leh sting ia ki kamram kiba ngi dei ban kit khia da shisha. Lada ngi phai na ka liang ki bor ba halor, wat tang u pud u sam kumba dei ruh ym pat urlong kum ba ki paidbah barabor ki angnud.

Ka Meghalaya ka dei shisha ka Ri ki lyoh. U lyoh um ju don pud don sam. U pud u sam wat shi para trai ruh, haba i mei i pa ki ai jaka, la dei ban pynbiang shuwa ban ai ia kano kano ka jaka. Ka kmie u kpa ki dei ki bieit ba khlem pynbiang ia u pud u sam haba ai jaka, kin pynlong thma ia ki khun shipara hadien bun tylli ki snem. Ym lah ban mut dur haba la ai ia ka Meghalaya, la ai bad pdiang matlah khlem tip ia u pud u sam haduh mynta. Sawphew lai snem mynshuwa kata ha ka snem 1977 haba ngi leit sha Mikir Hills (ba la khot ha ki por mynshuwa) mynta ba la khot Karbi Anglong. La iathuh ki riew tymmen haduh ha Umwaso ka jaka ka Ri Jaintia, hynrei mynta pat la kam ka Assam haduh Khanduli; yn nym slem lada iai long kumne shen shen ngin duh ki jaka ha Ri Khasi Ri Jaintia, bad kane shisha kan long ka jingduh kaba khraw.

Ha kito ki snem mynshuwa la iathuh ba uwei na ki Nongmihkhmat jong ngi u ba shlur bha u la pynpra ia u pud ba wan kam ka Assam, hynrei u long pynban ka kabu ksiar ia ka Assam ban ioh nang kiew nangkiew shaduh Khanduli, shu ong ba la don ka shnong Khanduli hynrei kin wan tur shaduh Saitsama hi. Kawei na ki jingtim ka long kane ba haduh ban da long kam shisha. Ngi duwai ba kin mih ki Nehemaiah ba ieit shisha ia ka Ri Ka Jaitbynriew, ban ia wer ban pynieng ia ki sawdong sawkun ba la pyntwa ia ki jaka puta, ka jaka ba kordor jong ngi. Ha ka jingiohi barit jong nga kane ka dei kawei na ki jingtim ba la jia mynta. Ngi duwai ba U Blei Un pyllait ia ngi na kane ka jingtim, khamtam kiba shong ha ki khappud peit kaei kaba la jia ha Ichamati bad ki thain Langpih.