Shillong, 08 Naitung:
U Inquiry Officer (IO) u Bah N Thohrem mynta ka sngi u la aiti ha ka Meghalaya High Court ia ka kaiphod ka kam Sia Lieh ne ka jyrsieh thung kam nonghikai beain ha ki LP skul ka jylla.
Kane ka jingaiti ka tnad pulit ia ka kaiphod Progressive Report jong ka jingtohkit halor ka kam thungkam nonghikai beain, ka la long hadien ba ka Kashari ha ka jingshong bishar ba la dep, ka la hukum ba ia u SP ka East Khasi Hills ba u dei ban aiti ia ka kaiphod sha ka Kashari hapoh ar taiew ia ka kaiphod jong ka jingtohkit.
Haba iakren bad ka President ka CSWO ka Kong Agnes Kharshiing kaba la ujor ehajar (FIR) halor kane ka kam, ka la ong ba ka Kashari kan sa bishar ia kane ka kaiphod hapoh shi taiew hadien ba u IO uba u dang shu kiew kyrdan kum u DSP, u la wan ban aiti ia ka kaiphod hynne ka sngi ha ka Kashari.
“U IO ba tohkit ia ka bamsap thungkam nong hikai u la aiti ha ka High Court”, la ong ka Kong Agnes bad bynrap ba kane ka kam ka dei ka kam beain kaba shyrkhei bad kiba donkti ki dei ban ioh ia ka jingpynsaja kaba biang katkum ka ain.
“Lada dei MLA ne minister ki dei ban shah pynshitom katkum ka ain. balei ia kiba rit baria tang shu pharep ruh ki kem wut wut katba ia kiba heh ba hain haba la biang ka sakhi ba la lap ka CBI ruh kim leh eiei”, la kynthah ka Kong Agnes ia ka tnad pulit.
“Ngi la ai FIR halor ka jinglap ka CBI ia ka jyrsieh thungkam beain ha ki LP skul. ka Kashari kam pat kyntait eiei ia ka kaiphod ka CBI”, la ong ka Kong Agnes bad bynrap ba hapoh shi taiew kyrmen ba ka Kashari kan sa leh eiei halor kane ka kam.
Lah ban kdew ba ha ka jingbishar ba dang shu dep shen, ka Meghalaya High Court ka la hukum ia u Superintendent of Police ka East Khasi Hills ban aiti noh ia ka kaiphod ka jyrsieh sia lieh ka kam thung kam nonghikai ha hapoh ar taiew.
Ka Kashari High Court ka la pynmih ia kane ka hukum ba ki pulit ki dei ban ai ia ia kaiphod ia ka jingiaid shaphrang ka jingtohkit halor FIR ba la ujor ia ka kam bamsap thungkam nonghikai LP skul kaba la paw pyrthei ha u snem 2009 haba bun ki myntri sorkar, ki MLA khamtam ka myntri ka pule puthi ha katei ka snem ka Kong Ampareen Lyngdoh ka la paw kyrteng ha ka kaiphod ka CBI.
Phi don ban ong eiei?