Hapoh 3 bnai dawa ka HSU, ban pynurlong ia ka Namdong Block

Shillong, 19’lyngkot:
Ka Hynniewtrep Students’ Union (HSU) ka la buh por lai bnai ia ka sorkar ba kan thaw bad pyntreikam noh ia ka C&RD Block ha Namdong, West Jaintia Hills bad lada ka sorkar jylla kam lah ban leh eiei katei ka seng ka la byrngem ban phah tuklar noh ha ka sorkar pdeng ia katei ka kam. U President katei ka seng u Kyrchan Rymbai u la ong ba ka sorkar ka la shim jaka naduh u snem 2013 ha Namdong ban thaw C&RD Block bad ka shnong ka la ai sngewbha ia katei ka jaka na ka bynta ka jingmyntoi ki paidbah.
U la ong ba ha ka 13 tarik u nailar, 2013 ki bor sorkar ryngkat ki bor shnong ki la leit jurip ia ka jaka ha Namdong bad la ai sngewbha 75539 suare metre ka jaka ryngkat ka jingiasoi soskular hapdeng ka shnong bad ka sorkar bad ha katei ka jingiasoi la ong ba ka shnong ka lah ban shim noh ia katei ka jaka ha kano kano ka por lada ka sorkar kam pyntreikam shuh lano lano ruh.
Utei u heh jong ka seng HSU u la ong ba kumba ka long mynta ki paidbah katei ka thaiñ ki mad jingeh bha namarba ka don tang ka Thadlaskeiñ C&RD Block kaba hap ban ai jingshakri haduh 124 tylli ki shnong bad na katei ka daw ka la pynsuki lut ia ki jingtreikam baroh. Katei ka seng ka la ther tyngeh ruh ia ki MLA ka Jaintia Hills namarba ki shu sngap jar ia katei ka kam.
“Kaba sngewsih eh ka long ba ka tnad C&RD ka dei kaba peit da u MLA jong ka Nartiang ka konstitwensi ba ka Namdong ka hap pynban u ma Sniawbhalang Dhar um shym la leh eiei ia katei ka kam” ong u Kyrchan dakaba bynrap ba katei ka seng kan ap ia ka lai bnai bad lada ym iohi dak eiei kan phah tuklar noh ha ka Ministry of Rural Development ka sorkar pdeng.