Hapdeng surok, kylla ka trok ha Quinine

Nongpoh: Mynta ka janmiet ha ka por 5 baje eiei janmiet, kawei ka trok kaba don ia u number ML 10B 7797, ka la kylla hapdeng ka surokbah NH-6 kaba hap hapoh ka shnong Quinine, Ri Bhoi District.

Katei ka trok ka dei kaba kit ia u dewiong ba la dep thang (Coke), ka dei kaba thmu ban hiar sha ki thain Guwahati, hynrei haba la poi ha katei ka jaka, kaba dei ka jaka kaba long khongdong, katei ka trok ka la kylla sha ka kawei pat ka liang jong ka surok bad kaba la pynlong syndon ia ki kali ba thmu kiew sha Shillong, ba kin hap ban iaid noh na ka liang bym dei (Wrong Side).

Tang mar ia tip halor katei ka jingjia, ki pulit pyniaid kali ha Ri Bhoi, ha ryngkat ki briew ka NHAI, ki la leit mar mar sha katei ka jaka, ban pynkynriah ia katei ka trok.

Ha katei ka jingjia ym shym la don kiba mynsaw, lait noh tang u nongniah jong katei ka trok, uba la mynsaw malu mala bad uba la rah noh ia u sha Nongpoh Civil Hospital, na ka bynta ban ioh ia ka jingsumar.