Nongpoh: Ka Dorbar Shnong Umbir, kaba don ha Ri Bhoi, hynnin ka sngi Saitjain, ka la ioh ban pynkut noh ia ka jingrakhe dap 50 snem ka shnong, kata hadien ba ka la ioh ban long kum ka Dorbar Shnong kaba pura ha ka 12 tarik u K’lyngkot u snem 1970. Katei ka jingrakhe dap 50 snem ka shnong Umbir, ka la naduh ka 12 Tarik u K’lyngkot 2019 bad ha ki jinngkynmaw ba shisnem lynter, la ioh ban pynkut noh hynnin ka sngi ka 12 tarik u K’lyngkot 2020, kaba ba ka shnong ka la dap 50 snem kynthih.
Ha katei ka jingrakhe, ka Dorbar shnong Umbir ka la pynlong ia ka jingrakhe kaba kyrpang ha phyllaw ka skul Khrumdiengiei Sedondary School kaba don ha shnong Umbir, ha kaba la iohi ba ki paidbah jong katei ka shnong, kaba kynthup naduh ki Longkmie, ki longkpa, ki khun samla kynthei shynrang bad ki khynnah rit, ki la iamih paidbah, na ka bynta ban pynpaw ia ka jingkmen ba ki la ioh ban rakhe ia katei ka jingdap ba 50 snem ka rta jong katei ka shnong, naduh ba ka la ioh ban long kum ka shnong kaba pura.
La sakhi ia katei ka jingrakhe dap 50, da ka jingdonlang u Bah Jason S. Mawlong, MLA ka Umsning, ka Kong Macdalyne S. Mawlong MDC, u Paiem Ainam Syiem, Acting Syiem ka Hima Mylliem, u Bah S. Syiemlieh, Rangbah shnong ka Umbir, u Bah P.J Kurbah, Secretary ka shnong Umbir, u Bah Stanliwis Rymbai, Rangbah shnong ba rim, kiwei ki nongialam shnong barima ka Umbir, ki rangbah shnong jong katei ka thain lem bad kiwei.
Ha katei ka jingrakhe dap 50 snem ka shnong, na ka liang ka Dorbar shnong lyngba ki riew rangbah, ki la iathuh khana lyngkot shaphang ki lynti kiba ka shnong kaba la iaid, tad haduh ba kan da ioh ia katei ka jingrakhe dap 50 snem.
Ki la iathuh ba ka Shnong Umbir, ha ki por ba mynshwa ka dei kaba hap hapoh ka shnong Umsawkhwan bad katei ka shnong, ka dei ruh kaba la sah tang da ki Nepali bad dang duna eh ki Khasi, hynrei ha kine ki 50 snem kiba la leit, ka shnong ka la kiew stet bad mynta ki la don da ki spah iing hapoh katei ka shnong.
Na ka jingkren da kitei ki riew rangbah barim ka shnong Umbir, kim lah khlem da pynpaw ia ka jingkmen, namar katei ka shnong ka la kiew stet shaba palat bad kumba ka long mynta lei, ka la dei kawei na ki shnong ha Ri Bhoi bad ka dei ka shnong kaba ki don bun tylli ki jaka pule bad ki skul.
Wat na ka liang u Bah Jason S. Mawlong lem bad ka Kong Macdalyne S. Mawlong, ki la pynpaw lem ia ka mynsiem kaba kmen ban iohi ba ka shnong, ka la pynlong ia ka jingrakhe kaba kyrpang halor ka jingdap ba 50 snem ka shnong Umbir.
Ki la ai ka jingkhublei kyrkhu kyrdoh bad ka jingkitbok kitwriang, ba katei ka shnong kan nangkiew shakhmat shaphrang halor ka roi ka par bad ruh ha ka bha ka miat hapoh ka shnong ka thaw.
Kitei ki nongmihkhmat ka Umsning Constitunecy, ki la kyntu ruh ia ki paidbah ka shnong Umbir, ba ki dei ban long kiba iatylli bad kiba iatreilang, khnang ba katei ka shnong kan long ruh kum kawei na ki nuksa ia kiwei pat ki shnong.
Lyngba katei ka jingrakhe dap 50 snem, ki nongialam ka shnong Umbir, ki la lah ban pynkup burom sha baroh ki nongialam shnong barim bad ruh ia ki nongialam shnong kiba mynta.
Phi don ban ong eiei?