Nongstoin:Ka office jong U District Child Protection Officer (DCPO), District Child Protection Unit, West Khasi Hills District, Nongstoin ki la pyntip paidbah ba ha ka 15tarik Naitung 2022 la don iwei i khyllung kynthei ba la shah bret noh ha ki briew ki bym tip harud ka surok ha Keinlangsaw hajan ka shnong Umkrem bad la ioh tam ia I tei i khyllung da ki briew bad mynta i don hapoh ka jingpeit jingkhmih jong ka office jong ka District Child Protection Unit bad Child Welfare Committee, West Khasi Hills District.
Ine i khyllung i don mynta hapoh ka jingsumar sukher jong ka Specialized Adoption Agency, Tiehsaw Nongstoin.
Katkum ka khubor kaba la iohlum, la ong ba ha katei ka jingjia ka la jia ha ka sngi thohdieng jong ka taiew ba la lah ha kaba uwei u nongniah kali kamai u ba la tip kyrteng kum u Dibarles Nongphud u ba mih na Nongshillong da ka jingthmu ban leit phai sha Laitkseh kumta ynda u la poi ha kawei ka jaka kaba hajan Wahliewlong kaba la khot kyrteng ka Kheinlangsaw u la hiar bad ha katei ka por u la ioh sngew ia ka jingiam jong itei I khyllung bad ha kaba nyngkong u nangmut ba dei ki rabit ne ki mrad, namar katei ka jaka kadei kaba bun bha ki rabit khlaw, hynrei ynda u la leit ban peit sha kata ka jaka u la lap pynban ba dei pynban I khyllung I ba la sop bha da ka jainsop katba ia u sohpet pat la shu sop malu mala.
Kumta u la pyrta briew bad leit peit sharum bad shaneng ioh lehse don ki briew kiba ioh iehnoh, hynrei ynda u la phone sha iing la phah noh ia u ban wanrah sha iing.
Kumta ynda u la poi sha iing u la pyntip mar mar sha ki bor shnong bad nakaliang jong ki bor shnong ruh ki la pyntip sha ki pulit jong ka Mairang ha kaba ki Pulit ruh ki la phah ban aiti noh sha ki bor ba dei peit khnang ban ioh iaka jingsumar kaba paka.
Kumta ka ophis jong u DCPO u la pyntip ba kino kino ki briew lane kiba haing hasem kiba don ka jingtip ne kiba don ka jingiadei bad ine i khyllung ki lah ban pyntip sha ka office jong ka District Child Protection Unit. Nongstoin lyngba ka phone No.8258076014 lane Child Welfare Committee, Nongstoin Ph.No 8787475664 lane sha ka Specialized Adoption Agency, Tichsaw Ph.No.6009768142/9862634887 bad ba kin wan shimmoh ia ine i khyllung bapoh ka 60 sngi bad lada ym don kiba wan shimti ia ine i khyllung hapoh katei ka sngi ba la buh ia ine i khyllung yn pynbna katkum ka ain ba ki lah ban shah tingkhun noh ia i.
Na ka liang ki bor sorkar dei ban leh da kaba tyngeh ia kum kitei ki jait kmie ne kpa ban ai ka jingpynsaja kaba ia ryngkat bad ki nongpyniap briew namar ka jingleh jong ki ka long thik ia ka jingthmu pyniap ia itei i Mynsiem balui lui… Nga shu kwah ai jingmut lem ia kito kiba don ka jingmut ban bret khun ba ki dei ban tip ba i dei i jingai bakordor tam jong u Blei bad kumba phi ju iohsngew ba don kiba kwah ban ioh khun hynrei kim ioh te nga kyrpad ia kito kiba mut bret khun ka bha ba phin shu leit aiti beit ia i khunlung sha ki bym don khun kiba thrang ban ioh khun ne sha ki kynhun kiba kloi ban pdiang ia i khunlung ban ri ban pynheh pynsan pat ia i. To tip ba kito ki briew kiba bret khun ka long ka jingtim ia ki hadien habud wat haba ki thrang ban don la i khun. Kumta da ia pyrkhat bha shwa ban leh ia kum kane ka kam ioh phi babe hadien habud… Khublei shibun… To u Trai Kynrad najrong natbian un ri un da un sumar sukher ia ka longrynñieng jong ine i khunlung ba in koit in khihkrat nangne shakhmat
Nga ruh nga kwah🙏 please ia noh ia nga…nga ruh ngm don khun re🙏