|
Nongpoh:Ha kaba pynkut noh ia ka Ri Bhoi Super Talent Show Season-1 2018, ka ‘The Leaonix’ ka kynhun tem na ka shnong Saisen, ka la long kum ka lahduh ha katei ka jingiakop ban pyni ia la ki sap ki phong, ka ‘The Green Image’ ka kynhun tem na Byrnihat ka la wan ha ka kyrdan Ba-ar, katba ia ka kyrdan Balai la rah da u samla Bloming S. Sylliang na ka shnong Iewmawlong.
Lah ruh ban pynpaw hangne, ba ia katei ka Ri-Bhoi Super Talent Show la pynlong da ka Ri-Bhoi Entertainment bad ka jingthmu jong katei ka rynsan ka long ban wad bad ban kyntiew ia ka sap ka phong jong ki khun samla ha ka Dong Ri Bhoi, kiba don ia ka sap bapher bapher bad kata ka long naduh ha ka put ka tem, ka rwai ka siaw lem bad kiwei kiwei. La pynkut ia katei ka Ri Bhoi Super Talent Show ha Parish Hall ka St. Pauls ha Nongpoh, kiba la iadonlang ha katei ka sngi ki kynthup ia u Bah Mayralborn Syiem MLA ka Nongpoh, Bah Rocky Marwein, u kyrtong ka Congress na Umsning, u Bah Rijied Khymdeit bad u Bah Standwell Manih ki nongpyniaid jong katei ka rynsan pyni sap, ki riew rangbah lem bad bun ngut ki paidbah na ki thain bapher bapher ka Ri Bhoi. Ha kaba pynkut ia katei ka rynsan pyni sap jong ki samla, ki la don haduh 22 ngut ki nongiashim bynta na kylleng ka dong Ri-Bhoi, kiba la iaknieh ban rah ia ka nam lahduh, hynrei na kitei ki 22 ngut la jied 8 ngut ba kin ioh ban iaknieh ia ka nam lahduh, haba ka jingiakop jong kitei ki 8 ngut, ka ‘The Leaonix’ ka kynhun tem bad rwai na ka shnong Saiden ka la wan ha ka kyrdan kaba nyngkong bad ban rah syndon ia ka nam lahduh ha Ri-Bhoi Super Talent Show Season-I 2018. Ka ‘The Leaonix’ kaba la wan ha ka kyrdan ba nyngkong, ka la ioh ban khur ia ka song pisa kaba T.25,000/- ryngkat ka trophy, ka ‘The Green Image’ kaba la wan Ba-ar ka la ioh ban khur ia ka song pisa T.12,000/-, katba u samla Bloming S. Sylliang, uba la wan ha ka kyrdan Balai u la ioh ban khur ia ka song pisa kaba T.7000/- ryngkat ka trophy. La sam ruh ia ki khusnam Consolation prize sha ki 5 ngut kiwei pat kiba la rung sha ka Top-8. |
