Shillong: Ka Shillong Lajong kan iakhun ia ka Neroca FC mynta ka sngi, ka 4 tarik Kyllalyngkot ha ka lumpung I-league ha madan Khuman Lumpak Stadium ha Imphal por 2 PM. Ia kane ka jingialehkai yn pyni ha Jio TV bad ha Hotstar App.
Ka jingiaid lynti ka Shillong Lajong ha kane ka samoi i-league ka dei ka jingtynjuh kaba jur bha ia ka haduh kine ki sngi namar ba ka la shah rem lynter bad ka la don mynta ha trai duh ka miej iakhein point napdeng baroh ki kynhun ha kane ka lumpung.
Haduh mynta ka Lajong ka kamai tang 4 point na ki 10 sien ialehkai ha kane ka lumpung bad khlem pep, lada ka jop lashai ka don jingkyrmen ban kiew kyndon kham shalor.
Ha ka jingialehkai ha la iing ha u bnai ba la dep, ka Lajong ka la shah rem da 2-1 kol ha ka Neroca.
Na ka liang u Coach ka Lajong u bah Alison Kharsyntiew u la kyrmen ba ka Lajong kan lah ban lehkai bha ban khur ia ka jingjop na kane ka lumpung hadien ka jingiaid lynti kaba khohruh khohram.
“Ka kylla baar ka la sdang bad ngi donkam ban ioh jinghikai na ka jingbakla na ka kylla ba nyngkong ka I-League”, la ong u bah Alison.
Katba ka Neroca FC ka don ha ka kyrdan baar da kaba kamai 18 point da kaba jop san sien, iakhaid lai sien bad shah rem ar sien.
U coach ka Neroca FC u Manuel Retamero Fraile u la ong ba kin pyrshang ban khur biang ia ka jingjop kumba ka la dep pynliem ha ka jingialehkai mynshwa.
“Ngin pyrshang biang bad ngin thew ban jop. Ngim lah ban shu khein jem tang namar ba ka Lajong ka la shah rem bad baroh ngi donkam ban long kiba kham husiar”, u la ong.