Nongpoh, 29 K’lyngkot: Ka Lehniam Sohjer ba-ar sngi, kaba dei ruh ka rukom Lehniam leh rukom da ki khun ki hajar jong ka Raid Marwet, kaba long ruh kum shibynta ban ainguh aidem ia u Lei Surnia, ka la kut noh mynta ka sngi hapdeng ka jingishongkun, da ka jingwan iashimbynta da ki khun ki hajar jong ka Raid Marwet, ka Raid kaba hap hapoh ka jingpeit jingkhmieh jong ka Hima Mylliem.
Ia katei ka Shad Sohjer, la pynlong da ka Raid Marwet Sohjer Committee bad haba pynkut mynta ka sngi, la sakhi da ka jingdon u Paiem Ken Syiem, uba dei u Syiem ka Raid Marwet, ha ryngkat ka jingdon u Bah Nathan Thangkhiew, uba long kum u Basan Nongkseh, ki Myntri ka Hima Mylliem, ki longsan basam ka Hima Mylliem, Raid Marwet lem bad kiwei.
Ha kine ki arsngi, jong katei ka Lehniam Sohjer, la don ki jingiakop bapher bapher naduh ka iakop shad iakop dro dur bad kiwei kiwei, katba ia ka lehniam ba kham kyrpang la pynlong mynta ka sngi.
Haba la pynkut ia katei ka Lehniam Sohjer, la pyndep ia ka knia ka khriam na ka liang u Syiem bad u Basan Nongkseh ruh kumjuh, ha kaba ki la ai ka jingkyrkhu kyrdoh ia ki ki khun ki hajar jong ka ka Raid Marwet bad ia ka jylla, ba u ne u snem un long ka jing kyrkhu iaki ba kin ia im im miat kin ia bha ka kamai kajih bad ban ia im ha ka suk ka sain.
Phi don ban ong eiei?