Hapdeng ka jingap thap ki samla pule na khyrdop, la pynjlan ia ka shuti u VC ka NEHU

Shillong: Hapdeng ka jingap thap ki samla pule bad ki nonghikai na knyrdop rung sha NEHU, ban khang lad ia u Vice Chancellor u Prof Prabha Shankar Shukla ban rung sha NEHU, ka tnad pule puthi ka sorkar India kala pynjlan shuti noh ia u sa 15 sngi.

U Prof. Shukla ula shimti ha kine ki sngi hadien ba la mih ka jingiakhih kaba jur ha NEHU haduh ba ka sorkar India ka la thung ia ka jingtohkit halor kane ka kynram kynram ha kane ka skulbah.
Haba kren mynta ka sngi, u Acting Vice Chancellor ka NEHU u Prof Nirmalendu Saha ula pyntip mynta ka sngi ba u Prof. Shukla ula pynjlan ia ka jingshim shuti sa 15 sngi hadien ba la bthah ka tnad pule puthi.
Ula ong ba ka sorkar pdeng kala bthah ia u ban shim shuti sa 15 sngi namar ba ka Inquiry Committee kam pat dep ia ka jingtohkit bad ban aiti ia ka kaiphod. Ula ong ba ka sorkar pdeng kan sa shim ia ka rai hadien ba la pule ia ka kaiphod ka jingtohkit.

Mynta hadien ba la ioh jingtip ba u VC u Prof. Shukla un wan trei biang, ki samla pule kynthup ka NEHUSU, KSU Unit bad ki nonghikai kila ap thap triang ha khyrdop ban khang lad ia u lada u wan sha NEHU.