Hap wan phai iing noh ki thei ka Meghalaya

Shillong: Ki thei ialehkai ka Meghalaya kila hap ban wan phai iing noh na ka lympung Hero Sub-Junior Girls National Football Championship hadien ba kila shah rem salit da 2-1 ha ki thei ka Gujarat ha ka jingiakhun kaba long mynta ka sngi ha nongbah Cuttack.
Kane ka jingialehkai ka long ban rai ia kano kaban ioh rung sha ka quarter-final na ka Group G namar ba ka Meghalaya bad ka Gujarat ki la iakhaid ka jingiakamai point.
Haka jingiakhun, ka Sanfida Nongrum ka la thep ia ka Meghalaya ha ka 8 minit hynrei ki thei ka Gujarat kila pynphai kylla hadien 4 minit ban pyniakhaid 1-1 haduh ban wai ka kyllastep.
Ka nam rem ia ka Meghalaya ka la wan hadien ba ka la shah thep sa kawei ha ka Gujarat kaba la neh haduh ban da kut syndon ka jingialehkai.
Hynrei watla kila shah rem, ki thei ka Meghalaya kin wan phai iing da ka jingkmen namar ba kila ialehkai bha watla ka dei ka sien kaba nyngkong ba kin iashim bynta ha kane ka lumpung.