Hap tohkit ia ka jingkynnoh ka UDP ia u Bah Pynshngain, ong ka KHNAM

Shillong, 13 Rymphang:
Ka jingthmu pynkhyllem ka UDP ia u Bah Pynshngain N Syiem na ka shuki CEM ka KHADC ka lah ban kynduh jingeh ban ioh ia ka jingbun paid. Haba twad jingmut na ka KHNAM kaba don arngut ki MDC, ka la ong ba haduh mynta ka dang skhem beit hapoh ka Executive Committee ban ialam da u Bah Pyn-shngain.
U president ka KHNAM u Bah Pyndap-bor Saiborn u la ong mynta ka sngi, ba ka party ka dang kyrshan beit ia u Bah Pynshngain bad haduh mynta kam pat iakren eiei ban weng noh ia ka jingkyrshan, kumba la paw ha ka kot khubor ia ka jingpan jingshai ka UDP na u CEM halor kiba bun ki daw bad kynnoh ia ka jingpyniaid bakla ia ki kam ka Council. “Ngi dang long hi kumjuh, ngi dan kyrshan beit ia u Bah Pynshngain, ngim pat iakren eiei”, la ong u Bah Pyndap.
U la ong ba ka jingtohkit ka UDP ia ka jingpyniaid bakla jong u Bah Pynshngain, dei ban pynlong ia ka jingtohkit khnang ban lap, la ka long kaba shisha ne em. “Ngim lah ban shu shim ba ka jingkynnoh ka long kaba dei, ngi hap ban tohkit ban lap ia ka jingshisha”,la ong u President ka KHNAM.
Haba twad jingmut la ka UDP ka la phah khubor eiei ne em sha ka KHNAM ban pan jingkyrshan ban pynkhyllem ia u Bah Pynshngain, u President ka KHNAM, u la ong, “Haduh mynta ngim ioh khubor eiei na ka UDP”.
Ha kawei ka liang, ka UDP ka la byrthen ba kan leh da kaba kam pyrshah ia u Bah Pynshngain lada um lah ban pynshai hapoh ka 16 tarik mynta u bnai ia ki khyndai tylli ki mat kiba ka la kynnoh ba u CEM u la leh donbor kaba ktah ia ka Council kynthup ka jingthungkam, ka jingpynlut ia ka pisa ka Council ia ka tamasa mawbynna bad kiwei.
Kumba ka long mynta ka jingiakren kynthah hapdeng ka UDP khamtam na u Bah HS Shylla bad u CEM ka la sdang ha kaba, u Bah Pynshngain u la kynnoh ba ka UDP ka thmu ban pynkhyllem ia ka EC da ka jingiatreilang bad ka Congress.
Katba u Bah Shylla u la kynnoh ba katkum ba paw, la shem ba ka jingsei ia ka pisa na ka Professional Tax da secretary barim ka Council u Bah Weljone Syiemlieh, ki long kumne, T. 50,00,000.00 (sanphew lak tyngka); T. 50,00,000.00 (sanphew lak tyngka); T. 20,00,000.00 (arphew lak tyngka); T. 12,00,000.00 (khaddar lak tyngka); bad T. 8,00,000.00 (phra lak tyngka); kata ba baroh ka pisa ba la sei ki long (50 lak + 50 lak + 20 lak + 12 lak + 8 lak) T. 1,40,00,000.00 (shi klur sawphew lak tyngka) bad ba la thep sha ka Personal Account u Bah Weljone Syiemlieh bad sha ka wei iba ha iing jong u.
Kaba la paw tyngkrein ka long ba na kata ka T.1,40,00,000.00 (shi klur sawphew lak tyngka) la thep pat sha ka Account jong ka Khasi Heritage Conservation Forum (KHCF) ka long T. 50,00,000.00 (sanphew lak tyngka), kaba u Bah Antonio War, EM, u long ruh u Chairman jong ka KHCF. Kaba pyni ba ka pisa kaba dang don ha u Bah Weljone Syiemlieh ka long (1,40,000.00 – 50,00,000.00) T. 90,00,000.00 (khyndai phew lak tyngka).