Hap thiah madan ki kynthei kha khun ha Civil Hospital Jowai

Jowai, 6 Iaiong:
La pynthiah ia ki longkmie armet ha madan ha Civil Hospital, Ialong –Jowai namar ka jingduna palat ki jingthiah ha katei ka Hospital. Ha katei ka Hospital ia ki khyllung ruh la pynthiah ha madan. Ka West Jaiñtia National Council (WJNC)-Central Body ka pynpaw ka jing sngewdiaw kaba khraw halor katei ka jingeh ba ki longkmie ki ia tyngkhuh na ki por sha ki por khamtam ha ka por kaba ki Kha khun ha katei ka Hospital.
Ka WJNC ka pynrem jur ia katei ka Hospital bad ia ki nongpyniaid ki jong ka namar katei ka jingdkoh bad ka la ong ruh ba nalor ka jingbym biang ki nos bad ki jingsumar ki paidbah ki hap ban mad pat sa katei ka jingeh. Ka kyntu ia U Myntri jong ka Tnad ka koit ka khiah bad ia ka Medical Superident jong ka Jowai Civil Hospital Ialong ba kin shim khia ia kane ka jingeh jong u duk u suk khnang ban lait na ki jing jia kiba sngewsih.