Hap soi soskular ki MDC ka UDP

Shillong, 18 Rymphang:
Ka UDP ka la bthah ia baroh ki kyrtong ka party ba kin iasoi ia ka soskular bad ka party katkum ka Indian Contract Act, 1872 kaban teh bad khum ia ki ban neh ha ka party hadien ba la dep jop ia ka elekshon.
“Ngi la phah soi ia ki kyrtong ban iasoi ia kane ka soskular ban khang lad na kaba ryngkoh diengkper hadien ba la jop elekshon ha ka Council. Namar ka jingbym don ka ain khang kyntiap, ki MDC ha ki snem ba la dep, ki mlien ban kyntiap seng”, la ong u working president ka UDP u Bah Bindo Mathew Lanong haba kren sha ki nongthoh ha kane ka sngi hatmajai.
U Bah Lanong u la ong ba ka party ka la pynbna ba ki kyrtong kiba jop elekshon ki bam smai ban nym phet seng hadien ba la jop ha ka elekshon.
U la ong ba ka party ka sngewthuh ia ka jingdonkam ban don kane ka jingiasoi hadien ba ha kane ka elekshon ba la dep, ka la mad ia kane ka jingeh ha kaba ki MDC ki phet seng. San ngut na ka 10 ngut ki MDC ka UDP ki phet seng ban leit pyniasoh sha ka Congress ha KHADC ba kynthup u Bah Artist Rani (Jirang), Dr Celestine Lyngdoh (Nongpoh), Fabian Lyngdoh (Umroi), Ostril Pamshong (Mawhati) bad Bah Rasor Rani (Mairang).
“Ngi lah ban ujor mukotduma ia u chairman lada u kyntait ban shim kam ia ki MDC bap het seng”, la ong u Bah Lanong. Katkum ka jingong u Bah Lanong, ka party ka kwah ban don ka ain khang pyrshah ia ka kyntiap seng ha ka Council.
“Ha ka jingshisha, ka district council ka la pdiang ia ka Defection Bill kaba iahap bad ka Anti-defection law ka jylla bad ka Parliament. Ka sorkar jylla ha u snem 2011 ka la phah sha ka sorkar pdeng ban don ka ain khang pyrshah kyntiap seng ha ka Council,” la ong u working president. Hynrei na ka liang ka sorkar pdeng kam shym la ai jubab haduh mynta halor kane.