Hap shim jingbit na KHADC, ban pynlong ïakob khwai dohkha

Shillong:U CEM ka KHADC u Bah Pynïaid Sing Syiem u la ïathuh ba na ka liang ka Council lyngba ka Executive Committee ba la shong ha ka sngi Baar ka la rai ban pynskhem ïa ka notification ba ïadei bad ka tnat Fisheries kaba dei ruh ka Act ne ka aiñ ba la dep don lypa ha kaba ïadei bad ki jingïakob khwai dohkha.

U la ïathuh ba lyngba ka jingpynbna hapoh ka tnat Fisheries la pyntip ba baroh kito kiba pynlong ïa ki jingïakob khwai dohkha ne fishing competition ha ki pung dohkha ne ki wah kiba dang hab hapoh u pud u sam ka KHADC ba ki dei ban ïoh ne hap ban pan jingbit ne permission na KHADC.
“Na ka liang jong ka Council lyngba ka tnat Fisheries ka la phah sha ki Deputy Commissioner jong ki 5 tylli ki district ha kaba ïadei bad kane ka jingpynbna bad halor ka bai pan jingbit na ka liang ka KHADC ka la dep buh ïa ka dor,” ong u CEM.

Ha kawei pat ka liang u CEM ka KHADC u Bah Pynïaid Sing Syiem u la ong ba ka EC ka la rai ban pynthymmai noh ïa ka Khasi Traditional Commission kaba khot ban ïoh ka jingithuh lyngba ka Act ha kaba lada don ki nongsumar dawai kynbat Khasi kiba kwah ban ïoh ïa ki syrnot ne certificate kidei ban aplai napoh ka KHADC.
Haba pyntip ba u Chairman jong katei ka Commission undei hi u CEM, na ka liang u Bah Pynïaid u la ong, “Kan don ka screening na ka bynta ban ai ïa ki cartificate sha ki nongsumar dawai kynbat Khasi naba la ju ïohi ba ki don ki jait jingpang kiba la duh jingkyrmen hapoh ki hospital, hynrei lyngba ki nongsumar dawai kynbat Khasi la lah ban pynkoit kum ka kheiñ ki shyieng bad kiwei.”

U la ïathuh ruh ba shen na ka liang ka KHADC kan sa plie noh ïa ka Shen yn sa plie noh ïa ka Khasi Institute of Traditional Medicine kaba don hapoh jong U Lum Sohpetbneng ka KHADC bad la don ruh ka jingthmu ban buh ïa ka Laboratory, ka rukom hikai ban song ïa ki dawai kaban long katkum ka juk leh khuid kaba mynta.

Nalor katei ka jaka pule u CEM u la pynpaw ruh da kaba ong, “Ka KHADC ka thmu ban khot ïa ki samla pule, ki Rangbah, ki scholar ban leh research halor ki riti dustur, halor ki 17 tylli ki jaka kiba ka jaitbynriew Khasi ka don halor ki riti dustur, ki rukom im, ki rukom synshar khaddar, ki ktien thylleij, ki rukom riam tynrai kaba lah ban leh lyngba ka tnat Elaka bad ki aiñ badon khnang ban lah pynneh pynsah nam ïa kine ki riti dustur tynrai.”