Hap pynkylla Lokayukta ban pynkhlain pyrshah bamsap:Rowell

Shillong, 05 K’lyngkot:
Ka sorkar ka dang pynkhreh ban pynkylla ia ka Meghalaya Lokayukta Amendment Act, 2013, ban pyniahap bad ka Lok pal bad ka Lokayukta Act, 2013 ka sorkar pdeng.
U Symbud Myntri Rangbah ka jylla ba peit ia ka kam ain u Bah Rowell Lyngdoh u la ong ha kane ka sngi Saitjain ba watla ka Meghalaya ka la iaid shakhmat ban pyntreikam ia ka ain lajong, hynrei kan sa eksamin la ka ain jong ka sorkar jylla ka iahap ne em bad ka ain jong ka sorkar pdeng.
Dang shen, u Vice President ka Congress u Rahul Gandhi u la khot ia ka jingialang jong baroh ki jylla ba synshar ka Congress bad u la bthah ia ki ban thaw ia ka ain Lokayuktas ha ki jylla kaba iahap bad ka Lokpal bad ka Lokayukta Act, 2013.
Lada ki jylla ki la pynbna ia ka Lokayukta, ka sorkar jylla ka dei ban thaw katkum ka ain Lokpal bad Lokayukta Act, katkum ka jingbthah u Rahul Gandhi. Ia kane dei ban pyndep shwa ka 28 tarik Rymphang.
Kane ka mut ba ia ka Meghalaya Lokayukta Amendment Act, 2013 kaba la pynkylla la ar sien, yn hap ban pynkylla shuh shuh.
Katkum ka jingong u Bah Rowel, la don ka lad ban pynbha ia kane ka ain bad ia kane, yn sa eksamin da ka sorkar.
U la ong ba lada donkam ia ka ain lah ban iakren bha hapoh iing dorbar ban pynkylla shuh shuh ia ka.
Ka jingdkoh jong ka Meghalaya Lokayukta Amendment Act, 2013 ka long ba ka duna ka jingkren shai ha kano ka rukom ki nongtrei Grade IV, ki nongtrei hapoh ka Grade IV, u Chief Justice, ne kino kino ki Judge jong ka High Court, ki ophisar bad ki nongtrei ka High Court, ki dkhot ka Meghalaya Judicial Service bad u Chairman lane u dkhot jong ka Meghalaya Public Service Commission la pynlait na ka kyndon jong ka ain Lokayukta Act.