Hap pyndep ia ka jingker sainar ban khang rung beain:Mukul

Shillong, 8 Risaw:
U Myntri Rangbah ka jylla u Mukul Sangma u la ong ba donkam ban pyndep noh ia ka jingker sainar ha ki khappud ka India bad ka Bangladesh kiba don ha jylla Meghalaya khnang ban khang lad ia ka jingwan rung beain ki briew sha kane ka jylla.
“Khlem ker sainar, ka long kaba eh ia ki bor iada BSF ban pahara ia ka khappud baroh”, la ong u Mukul Sangma haba jubab ia ka jingkylli ba la wanrah da u MLA ka Sohra u Bah Tistosttarwell Chyne hapoh ka iing dorbar hynne ka sngi.
U Mukul u la ong ba ki briew na kylleng ki jaka jong ka khappud, ki dang iohlad ban rung sha Meghalaya namar bym ker sainar.
“Dang shen, nga la pule ia ka khubor ba bun ki khar Bangladesh ki la wan shah kem ba rung beain ha Jaintia Hills. Baroh ia kine ki nongbylla lakem na ki par dewiong”, la ong u Myntri Rangbah.
U Mukul u la ong tang kane ka jingker sainar kaba lah ban khang lad ia ka jingwan rung beain ki briew na shiliang ka ri.
“Ka lynti kaba bha eh ban khanglad ia ka jingwan rung ki briew nabar, ka long ban ker sainar ia ka khappud” la ong u Mukul.
Ha kajuh ka por, u la pynpaw ia ka jingsngew bynniaw halor ka jingpyrshah jong ki briew ban ker sainar shiah ha ki katto katne ki bynta namar ki daw ba bun.
U la ong ba ka jingker sainar ka dang iaid shaid shaid ha ki 135 km katba katto katne kilomer la dep ban ker ha u snem 2005.
“Kaba sah ka long 148 km ba don ka jingpyrshah na ki shnong bad ki paidbah”, u la ong.
U la ong ba donkam ban poi sha ka jingiasngewthuh jingmut halor kane ka jingeh shwa ban ker sainar.
U la iathuh ba baroh 1562 ngut la lap ba ki dei kiba wan rung beain ha u snem 2010 bad ha u snem 2011 la ioh bat 2800 ngut kiba wan rung beain sha kane ka jylla.
“Ngi la lap baroh kiba wan rung beain ki long 6182 kiba dei ki nongbylla ha u snem 2012. Ka jinglap ia ki briew kiba wan rung beain ka la nang bun na u snem 2012 namar ka jingpynkhlain ia ka jingpahara”, u la bynrap.