Shillong:Namar ka jingshah pynthut ki skul bad ki klas na ka jingwan lynshop jong ka khlam Covid-19 ha ka jylla naduh ka snem 2020. kaba la wanrah shibun ki jingeh ia ki khynnah pule bad kumjuh ruh ia ki nonghikai, ka sorkar Meghalaya ha ka 15 tarik u bnai Naiwieng 2021 ka la rai ban pynjrong ia ka rukom long skul jong ki khynnah skul ha ka jylla.
U Bah Donald P Wahlang, u ba dei u Additional Chief Secretary in-charge jong ka tnad pule puthi ha ka jylla, u la ong ba ka jingpyn jrong ia ka rukom long skul na ka bynta ka academic session 2021-2022 kan kut haduh ka 10 tarik u bnai Nohprah 2021, na ka bynta ki khynnah rit ne ki pre-primary bad na ka bynta ki klas 1 haduh klas 12 pat kin kut haduh ka 25 tarik u bnai Rymphang 2022.
U Bah Donald P Wahlang, u la ong ruh ba ka Selection test na ka bynta ki khynnah ki ban ialeh ia ka eksam SSLC ne ka matrik na ka bynta ki khynnah regular bad ki private kan long hapdeng u bnai Risaw bad Naiwieng bad ka eksam final pat na ka bynta ki SSLC bad ki HSSLC kan long hapdeng u bnai Lber bad u bnai Iaiong jong u snem 2022.
La bthah ruh ia ki skul ba kin pyndep 100% ki lynnong ne ki syllabus na ka bynta ki klas baroh kumba dei bad na ka bynta ki klas 11 bad klas 12 pat kiba kynthup ia ki Commerce bad Science Stream,ka sorkar ka la bthah ba kin bud katkum ki rukom jong ka CBSE.
Ki scheme na ka bynta ka internal assessment ha ka Term I bad II ha ki kyrdan secondary ki higher secondary kan long katkum ka jingbthah da ka the executive chairman jong ka Meghalaya Board of School Education(MBOSE).
Phi don ban ong eiei?