Hap mareh sha Assam, namar ba kham bha bad jan ki jaka sumar

Nongrim Jirang:Ka thain khap pud ka Meghalaya syndah bad ka jylla Assam, ka dei kaba shah ieh shrah bha ha ka sorkar la jong bad ki dak ki shin ki la paw shynna ha kaba ki surok, ka koit ka khiah, ka um bam umdih, ka bording kiba dei ki jingdonkam ba kongsan ki long lyngkrang.

Ha ki lad jing sumar, ki briew ki hap mareh sha Assam na mar ba ka kham biang bad ka kham jan ban leit sha ki jaka sumar kiba don hapoh ka Meghalaya. Wat tang ka Secondary School kam pat don kaba la buh ka jingeh ia ki khynnah bad ki kmie kpa ban phah skul sha jngai bah na shnong.
Ha ka jingleit hiar u nongthoh khubor sha khappud ha ka thain Jirang ka Ri- Bhoi, la lap ba ka surok kaba shakri ia kiba bun ki shnong ha ka thain naduh ka Nongrim Jirang, Jareibasai, Umkrem Dyngkhong, bad kiwei, ka la jot la pei lut bad kylla kum ki pung bad ki lyhuh um haduh ba ka shem jingeh ia ka leit ka wan jong ki paidbah katei ka thain khappud nalor ka jingbym pat biang ka umbam umdih, ki lad jingsumar bad ka bording.

Ha ka jingiakren bad u Chairman ka Chairman Dorbar Pyllun Lai Shnong Nongrim Jirang, Jereibasi, Umkrem Dyngkhong u bah Ambrose Doloi, u la iathuh ba haba ianujor bad ka Assam, ka Meghalaya kam long eiei ha ki kam pynroi ha khappud namar ba ha ki bynta ba hap ha Assam, ki surok bad kiwei ki jingdonkam ki biang katba ki jaka ba hap sha Meghalaya, ka long da khongpong.
“Ngi la buddien ia kane ka surok na ka por sha ka por bad hadien ba la dep buddien, la iathuh ba ia ka jingmaramot ia kane ka surok na lad MMR Road shaduh Jareibasai, kim pat wan ban pyndep bad la pyntip sha ka ophis bad sha u nongmihkhmat jong ngi (bah Sosthenes Sohtun), la iathuh ba kila pyrshang ban pynioh biang ia ka jingmaramot na u kompeni uba kyrteng u Agarwal ba kin wan trei noh mynta hi”, la ong u bah Ambrose.

Haba iathuh ba ka jingdonkam palat ka dei ka jaka pule kaba biang ha katei ka thain khappud. “Ngi la ju iakren ba kawei kaba donkam eh ka jingeh ban weng ka dei ka jingdonkam ban plie ia ka Secondary School namar ba ka la jngai haduh 20-25 km shaduh New Jirang bad la iakren man ka por hynrei haduh mynta khlem pat urlong”, u la ong.
Ha kajuh ka por kawei pat ka jingeh kaba donkam ban weng, ka dei ka jingdonkam ban don ka sub-centre ban ai ka jingshakri ka jingkoit jingkhiah. “Kawei ka jingdonkam ka dei ban don ka sub-centre ha Nongrim Jirang namar ba bunsien haba pang ba shitom, la hap ban leit sha Assam namar ba kam don ki lad jingsumar kiba biang bad ka kham jan”, la ong u bah Ambrose.

U la bynrap, “Wat ia ka jaka ban shna ia ka sub-centre la dep ban ai bad la pynkhreh naduh 2015 bad ha kano kano ka por ba ka sorkar ka ai, yn shna ha katei ka jaka ba ka shnong ka la pynkhreh”, la ong u chairman ki Lai Shnong.
Kawei ruh ka dei ka jingbym biang ka umbam ha katei ka thain, bad u bah Ambrose u la iathuh ba ha u snem 2019 ne 2020 la wanrah ia ka skhim JJM hynrei kane ka jingpynkhreh kam pat urlong satia haduh mynta.
“Nalor kine, ka bording ka dei kaba kynduh jingeh bha namar ba kam biang”, u la bynrap.