Hap leit nguh, ki nonghikai Sacred Heart ban ioh tulop

Shillong, 13 Lber:
Ki nonghikai ka Sacred Heart Boys Higher Secondary School Mawlai ki hap nguh hap dem ia u Principal ka skul lada ki kwah ban ioh tulop.
Katkum ka kyrwoh khubor ba la pyllait da ka KJDSTA Mawlai Unit, ki la ong ba mynta ka sngi ka la mih ka jingiahylla ba jur pyrshah ia u Principal ha ophis treikam jong u, namar ba pynslem palat ia ka tulop jong ki nonghikai ki bym shym pat ioh haduh mynta ruh.
Kane ka jingpyn slem tulop kam pat ju jia ha ki samoi treikam jong kiwei pat ki Principal hynrei dei tang hapoh ka jinglong Principal jong une uba mynta ba ki nonghikai kim shym la ioh ia ka tulop.
Ym tang katta une u Principal u ju mlien ban pyndik ia ka tulop jong ki nonghikai bad dei mynta ka sngi ba ki nonghikai kim lah shah shuh ki la leit ban dawa ia ka hok jong ki ha kaba la mih ka jingiania kaba jur, la ong ka KJDSTA ba la pyllait da u MS Lyngdoh u Pre sident bad u G Kharmujai Secretary ka seng.
Kawei pat ka daw kaba pynbitar shuh shuh ia kiba bun ki nonghikai ka long ba ki shym ba don ka jingleh shilliang khmat ha kaba ia kito ki nonghikai kiba u sngewieit sngew iadei u la dep ai ia ka tulop jong ki naduh ka 9 Lber 2015 bad ia kane la pynshihsha haba la iohi ia ka cheque kaba u la ai ha uwei na ki nonghikai.
Hynrei hab kiwei pat ki nonghikai ki la leit ban iakynduh ia u ban dawa ia la ka hok, ha kaba nyngkong u la ai daw bym don pisa hynrei katba nang iaid ka jingiania u la ong pynban ba tang kito kiba kyrpad na u un ai ka pisa bad ia ki bym leit kyrpad un nym ai, la ong shuh shuh kitei ki nongkitkam ka KJDSTA Mawlai Unit.
Ka jingkylli kaba ki nonghikai ki la buh hakhmat jong u ka long, hato ka dei mo ban hap kyrpad ban ioh ia ka jong ka hok, la buh jingkylli ka seng bad ka la bynrap ba ki nonghikai ki bym pat ioh ia ka tulop kin sa leh ia kaba donkam pyrshah ia utei u Principal.